Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 440 Hüküm no: 633 Orijinal metin no: [53b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail b. Mustafa’nın kendisine hizmet eden Havva Hanım’a olan borcunu ödemesi Ma‘rûz; Medîne-i Üsküdar’da Davudpaşa mahallesinde sâkine mu‘arrefetü’z-zât Havva bt. Ali nâm hatun meclis-i şer‘-i hatîrde İsmail b. Mustafa mahzarında mezbûr İsmail’in kız karındaşı kızı olup ücret ile hizmet eder makūlesinden olmamla bundan akdem mezbûr hâlim İsmail’e dört sene menzilinde ücret kavlinsiz hizmet etmekle sinîn-i mezkûrede müstahıkka olduğum hizmetin ecr-i mislini taleb ederim deyü da‘vâ, ol dahi cevâbında ancak on sekiz ay hizmetini ikrâr, mâ‘adâyı inkâr etmeğin müdde‘iye-i mezbûre ziyâde hizmetini beyâna ba‘de’l-havâle şühûr-ı mezkûrede eylediği hizmetinin ecr-i misli beher şehr yüzer paradan cem‘an elli dört guruş ecr-i misli olduğunu ba‘de’l-ihbâr meblağ-ı merkūm elli dört guruşun esnâ-yı hizmetinde müdde‘iye-i mezbûreye teslîm eylediği mecmû‘-ı on buçuk guruş kıymetli bir ferâce ve bir entari ve bir hırkadan bâkī kırk üç buçuk guruşu müdde‘iye-i mezbûreye edâ ve teslîme hâli mezbûr İsmail’e tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Ş sene 1205