Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 440 Hüküm no: 634 Orijinal metin no: [53b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Salih b. Mustafa’nın muhâlaa yoluyla boşandığı eşine aid eşyaların bedellerini ödediği Ma‘rûz; Medîne-i Üsküdar’a tâbi‘ Dudullu karyesinde sâkine mu‘arrefetü’z-zât Emine bt. Hüseyin nâm hatun medîne-i mezbûrede meclis-i şer‘-i hatîrde zevc-i sâbıkı Salih b. Mustafa mahzarında mezbûr Salih zevcim olup bundan akdem bâ-hüccet-i şer‘iye muhâla‘a olduğumuzda hîn-i akdde mehr-i mu‘accel tesmiye olunan mecmû‘-ı kıymetleri seksen guruşa bâliğ eşyâ-i memlûkemden yedi şayak yasdık ve iki minder ve üç yemeni mak‘ad ve bir beledî döşek ve bir orta keçesi ve iki yorgan ve dört sahan ve üç tencere ve bir leğen ma‘a ibrik ve bir sini ve bir sagīr tebsi ve bir tas ve bir lenger ve bir tâbemi bana teslîm etmeyip yedinde olmağla mevcûd ise aynını müstehleke ise kıymetini taleb ederim [deyü da‘vâ] eylediğimde ol dahi ber-vech-i muharrer ikrâr ü i‘tirâf edip zikr olunan eşyânın kıymet-i mezkûresi olan seksen guruşu işbu meclis-i şer‘de bana def‘ ü teslîm ben dahi yedinden tamamen ahz ü kabz eyledim deyü takrîrini mezbûr Salih tasdîk eylediği bi’l-iltimâs huzûr-ı âlîlerine i‘lâm olundu. Fî 12 min-Ş sene 1205