Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 441 Hüküm no: 635 Orijinal metin no: [53b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayıkçı Süleyman’ın Yanaki v. Kostanti’den iddia ettiği alacak davasının kanunsuz olduğu Ma‘rûz; Medîne-i Üsküdar’da Büyük İskele’de Kayıkcı Süleyman b. İbrahim nâm kimesne medîne-i mezbûrda mahfil-i bâbda meclis-i şer‘-i hatîrde Yanaki v. Kostanti nâm zimmî muvâcehesinde târih-i i‘lâmdan iki sene mukaddem refîkim gāib ani’l-meclis Hüseyin b. Abdullah nâm kimesne merkūm Yanaki zimmîden bi-gayrı hakkın elli guruşunu ahz etmek sevdâsında olup merkūm Yanaki zimmî dahi gāib-i mezbûr içün bostancıbaşı ağaya teşekkî ve ağa-yı müşârün-ileyh dahi beni gāib-i mezbûr zannıyla ahz ve kal‘aya habsedip ben dahi hapiste iken mâlımdan iki yüz guruş umûruma masrûfum olup lâkin Ağa-yı müşârün-ileyhin beni habsi mücerred merkūm Yanaki zimmînin teşekkîsine binâen olmağla ben dahi masrûfum olan meblağ-ı merkūm iki yüz guruşu merkūm Yanaki zimmîden taleb ederim deyü müdde‘î-i mezbûrun ber-vech-i muharrer tasaddî eylediği da‘vâ-yı gayr-ı meşrû‘asına iltifat olunmadığı bi’l-iltimâs huzûr-ı âlîlerine i‘lâm olundu. Fî 24 min-Receb sene 1205