Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 428 Hüküm no: 443 Orijinal metin no: [103a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hadice bt. Mustafa’nın cariyesi Fehmi’yi gasbedip satan Zeyneb bt. Ali’ye bedelini ödemesi için tenbih olunduğu [Aşağıdaki üç i‘lâm aynı konuda olduğu için tek özet yapılmıştır. (Ed.)] Râşid Efendi hazretlerinin nâibi Ahmed Efendi’nin mührü ile. Ma‘rûz Kapıkethüdâsı Mahmud Beşe mübâşeretiyle Bâb Mahkemesi’ne ihzâr olunan Zeyneb bt. Ali nâm hatundan hasmı Hadice bt. Mustafa nâm hatun meclis-i şer‘de yedimde mülküm olan Rusiyyetü’l-asl Fehmi nâm bir re’s câriye-i memlûkem bundan akdem yedimden ibâk ve mezbûre Zeyneb’in menziline varıp mezbûre Zeyneb dahi câriye-i merkūmeyi fuzûlî ahz u gasb ve âhara bey‘le istihlâk etmeğin câriye-i mezbûrenin yevm-i gasbda dört yüz guruş kıymeti olduğu ecilden meblağ-ı mezbûru mezbûre Zeyneb’den taleb ederim deyü da‘vâ eyledikde mezbûre Zeyneb cevâbında müdde‘iyye-i mezbûrenin câriye-i memlûke-i mezkûresini ber-vech-i muharrer bi-gayr-ı hakkın gasb ve yüz elli guruş semen-i makbûza âhara bey‘le istihlâk eylediğini ikrâr edip lâkin yevm-i gasbda câriye-i mezkûrenin yüz elli guruşdan ziyâde kıymeti olduğunu inkâr etmeğin mûcebince mertebe-i ikrârı olan yüz elli guruşu müdde‘iyye mezbûre Hadice’ye bi-tarîkı’d-damân edâya mezbûre Zeyneb’e ba‘de’t-tenbîh müdde‘iyye-i mezbûre Hadice câriye-i mezbûre kıymetinden müdde‘âsı olan ziyâde-i mezkûreyi beyâna havâle olunduğu bi’l-iltimâs huzûr-ı âlîlerine i‘lâm olundu. Fermân men-lehü’l-emrindir. Fî 4 R sene 1143. Kezâlik yine Ahmed Efendi’nin mührü ile. Ma‘rûz Derûn-ı i‘lâmda mezkûr Fehmi nâm câriyenin yevm-i gasbda kıymeti dört yüz guruş idiğini müdde‘iyye-i mezbûre Hadice Hatun mezbûre Zeyneb muvâcehesinde şuhûd-ı udûlden Sultan Selim’de sâkin Mustafa Çelebi b. İbrahim ve Alipaşa’da sâkin Simkeş Mehmed Çelebi b. Ahmed nâm kimesneler ile isbât etmeğin mûcebince meblağ-ı mahkûmun-bih mezbûr yüz elli guruşdan ziyâde iki yüz elli guruşu dahi müdde‘iyye-i mezbûreye edâya mezbûre Zeyneb’e tenbîh olunduğu bi’l-iltimâs huzûr-ı âlîlerinde i‘lâm olundu. Fermân men-lehü’l-emrindir. Fî 11 R sene [1]143. Efendi hazretlerinin mührü ile. Ma‘rûz Derûn-ı i‘lâmda mastûrü’l-ism Hadice Hatun hasmı olup derûn-ı i‘lâmda mastûrü’l-ism Zeyneb Hatun üzerine işbu i‘lâm mantûkunca hükm-i şer‘î lâhık olan yüz elli guruşdan mukaddemâ on guruşu kabz edip bu def‘a dahi yirmi guruşu ahz u kabz eylediğinden sonra kırk guruşun beher mâh yirmişer paradan seksen ayda kırk guruşunu kendiye teslîm etmek üzere te’cîl ve taksît eyledikde ol dahi kabûl ve ber-vech-i muharrer edâya ta‘ahhüd eylediğinden sonra merkūme Hadice mâ‘adâ mezbûre Zeyneb zimmetinde bâkī kalan seksen guruş hakkından min-ba‘d Zeyneb’in zimmetini ibrâ ve iskāt eylediği tescîl olunmuşdur. Fî 22 Safer sene [1]143. Bu üç i‘lâm bir maddedir.