Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 441 Hüküm no: 636 Orijinal metin no: [53b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ağya v. Karabet’in Mustafa Efendi’ye olan borcunu ödediği Ma‘rûz; Medîne-i Üsküdar’a tâbi‘ Kādı karyesinde sâkin Mustafa Efendi b. Mehmed tarafından ber-vech-i âtî vekîl olduğu Bostanî Memiş b. Mahmud ve Ahmed b. Osman nâm kimesneler şehâdetleriyle sâbit olan Kalyoncu Mehmed b. Osman medîne-i mezbûrede meclis-i şer‘-i hatîrde Ağya v. Karabet nâm zimmî muvâcehesinde mersûm Ağya zimmî bundan akdem müvekkilim mezbûr Mustafa Efendi yedinden iştirâ ve kabz eylediği aded ve fiyâtı beynlerinde ma‘lûm tahta akçesi semeninden altmış dört guruş zimmetinde hakkı olmağla bi’l-vekâle taleb ederim deyü da‘vâ ve merkūm Ağya zimmî cevâbında müvekkil-i mezbûr Mustafa Efendi’ye ol-mikdâr deyni olduğunu ikrâr lâkin dört ay mukaddem merkūm Mustafa Efendi mahmiye-i İslâmbol’da Paşakapısı’nda Vekilharç Mustafa Ağa yediyle tamamen edâ etmişdim deyü ba‘de’d-def‘ ve’l-inkâr dâfi‘-i merkūm Ağya zimmî def‘-i mezkûrunu udûlden el-Hâc Mustafa b. Ali ve Ali b. Salih nâm kimesneler şehâdetleriyle vekîl-i mezbûr muvâcehesinde isbât etmeğin mûcebiyle müdde‘î-i vekîl-i mezbûr da‘vâ-yı mezkûresiyle merkūm Ağya zimmîye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî 11 min-Receb sene 1205