Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 442 Hüküm no: 637 Orijinal metin no: [53b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Ali ile İsmail b. Ahmed’in alacak taleblerinde bulunmalarına itibar edilmediği Ma‘rûz; Vilâyet-i Anadolu’da Tosya kazâsına tâbi‘ Ekincik karyesi ahâlisinden olup medîne-i Üsküdar’da Balaban İskelesi’nde sâkinler Hüseyin b. Ali ve İsmail b. Ahmed medîne-i mezbûrede mahfil-i bâbda meclis-i şer‘-i hatîrde Ahmed b. Mehmed mahzarında mezbûr Ahmed târih-i i‘lâmdan bir ay mukaddem kazâ-i mezbûrede sâkin Cabbarzâde etbâ‘larından Mustafa Ağa nâm kimesnenin hizmetinde olup karye-i mezbûrenin koruluğundan odun kat‘ ederken mezbûr Ahmed’i men‘ irâdesinde olduğumuzda sizi darb ederim deyü bizi ihâfe eylediğinden gayri beni karye-i mezbûre ahâlisi darb eylediler deyü mezbûr Mustafa Ağa’ya şekvâ, ol dahi Cabbarzâde’nin ismi ma‘lûmumuz olmayan bir bölükbaşısı gönderip bizi habs ve onar guruşdan cem‘an ikimizin yirmi guruşumuzu ahz etmekle mezbûr Ahmed’den taleb ederiz deyü takrîr-i meşrûhları üzere eyledikleri da‘vâlarına iltifât olunmadığı bi’l-iltimâs huzûr-ı âlîlerine i‘lâm olundu. Fî 20 min-Ş sene 1205