Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 442 Hüküm no: 638 Orijinal metin no: [53b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emine Hanım’ın boşandığı kocası Seyyid Halil ile nafaka ve alacak verecek davasında sulh oldukları Ma‘rûz; Medîne-i Üsküdar’da Toygar Hamza mahallesinde sâkine mu‘arrefetü’z-zât Emine bt. Hüseyin mahfil-i bâbda meclis-i şer‘-i hatîrde zevc-i sâbıkı es-Seyyid Halil b. es-Seyyid Ebûbekir mahzarında mezbûr es-Seyyid Halil mukaddemâ zevc-i dâhilim olup mezbûrun firâşından hâsıla ve benden mütevellide hâlâ on bir yaşında olan kızım Şerife Âişe’nin nafakası içün bâ-hüccet-i şer‘iye zevcim mezbûr üzerine kıbel-i şer‘den takdîr olunan beher şehr üçer guruş nafaka-i mefrûzasından dokuz yaşına gelince müddet-i merkūmede sekiz aylık yirmi dört guruş ile yine nafaka-i mefrûzeden mukaddemâ zevcim mezbûrun zimmetinde bâ-i‘lâm-ı şer‘î şer‘î mahkûmün-bih olan seksen guruşdan bâkī yirmi guruş ki cem‘an kırk dört guruş hakkım olmağla taleb ederim deyü eylediği da‘vâsından bâ-tavassut-ı muslihîn on beş guruş bedel-i makbûza zevci mezbûr es-Seyyid Halil ile sulh olup her biri hukūk-ı zevciyete ve sâireye müte‘allika âmme-i de‘âvîden âharın zimmetini ibrâ ve ıskāt ve her biri âharın ber-vech-i muharrer ibrâsını kabûl eyledik deyü kat‘-ı münâza‘a eyledikleri takrîrleri bi’l-iltimâs huzûr-ı âlîlerine i‘lâm olundu. Fî 18 min-Ş sene 1205