Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 443 Hüküm no: 639 Orijinal metin no: [53b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Başkasıyla evlenen Emine Hanım’ın on yaşına gelen kızı Ayşe’yi boşandığı kocası Seyyid Halil’e teslim etmesi Ma‘rûz; Medîne-i Üsküdar’a tâbi‘ Nerdubânlı karyesinde sâkin es-Seyyid Halil b. es-Seyyid Bekir mahfil-i bâbda meclis-i şer‘-i hatîrde zevce-i sâbıkāsı mu‘arrefetü’z-zât Emine bt. Hüseyin nâm hatun mahzarında mezbûre Emine mukaddemâ zevce-i medhûlün-bihâm olmağla firâşımdan hâsıla ve mezbûreden mütevellide ve târih-i kitâba gelinceye değin bi’l-hıdâne hacr ve terbiyesinde olan kızım Şerife Âişe nâm sagīreyi bâ-hüccet-i şer‘iye beher şehr üçer guruş nafaka takdîriyle infâk üzere iken mezbûre Emine nefsini sagīre-i mezbûreye ecnebî olan gāib ani’l-meclis Yusuf nâm kimesneye tezvîc eylediğinden mâ‘adâ hâlâ sagīre-i mezbûre dahi on bir yaşını tekmîl ve ol-vechile mezbûre Emine’nin hakk-ı hidânesi sâkıt olmağla kızım mezbûre Şerife Âişeyi bana teslîme mezbûre Emine’ye tenbîh olunmak matlûbumdur deyü da‘vâ eyledikde ol dahi ikrâr ü i‘tirâf etmeğin mûcebiyle sagīre-i mezbûreyi babası mezbûr es-Seyyid Halil’e teslîme mezbûre Emine’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 18 min-Ş sene 1205