Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 444 Hüküm no: 641 Orijinal metin no: [54a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvader v. Agop’un Rum Patriğinden on altı nefer zimmî adına aldığı parayı hak sahiplerine ödediği Ma‘rûz; Medîne-i Üsküdar’da Selami mahallesinde mütemekkin Firkateci Kostanti v. Yani nâm zimmî medîne-i mezbûrda mahfil-i bâbda meclis-i şer‘-i hatîrde Rum patriki tarafından ber-vech-i âtî vekîl olduğu Anaştaş v. Nikola ve Nikoti v. Bedros nâm zimmîler şehâdetleriyle sâbit olan Asvader v. Agob nâm zimmî muvâcehesinde işbu sene-i mübârekede donama-yı hümâyûn firkatelelerinden tertîb olunan beheri seksener guruşdan on altı nefer zimmî [içün] vekîl-i merkūm Asvader zimmî Rum patriğinden bin iki yüz seksen guruş tamamen ahz ve bana isâbet eden seksen guruşun otuz guruşunu işbu hâzır bi’l-meclis Parsih v. Kigork nâm zimmî yediyle bana edâ ve teslîm ve bâkī elli guruşu vekîl-i merkūm zimmetinde kalmağla taleb ederim deyü da‘vâ ve vekîl-i merkūm cevâbında meblağ-ı bâkī-i merkūm elli guruşu müdde‘î-i merkūma def‘ ü teslîm etmiş idim deyü ba‘de’d-def‘ ve’l-inkâr dâfi‘-i merkūm ber-vech-i muharrer def‘ini ricâl-i Nasârâdan Mıgırdıç v. Agob ve Misak v. Avadik nâm zimmîler şehâdetleriyle ber-nehc-i şer‘î muvâcehesinde isbât etmeğin mûcebiyle müdde‘î-i merkūm Kostanti zimmî da‘vâ-yı mezkûresiyle vekîl-i merkūm Asvader zimmîye bî-vech mu‘ârazadan men‘ olunduğu bi’l-iltimâs huzûr-ı âlîlerine i‘lâm olundu. Fî ( ) min-Ş sene 1205