Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 445 Hüküm no: 644 Orijinal metin no: [54a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ayşe Hanım’ın Ayşe bt. Mehmed’e olan borcunu taksitle ödeme konusunda kefalete bağlandığı Ma‘rûz; Medîne-i Üsküdar’da Davudpaşa mahallesinde sâkine mu‘arrefetü’z-zât Âişe bt. el-Hâc Ömer nâm hatun meclis-i şer‘-i hatîrde dâyinesi kezâlik zâtı mu‘arrefe diğer Âişe bt. Mehmed nâm hatun mahzarında cihet-i deyn-i şer‘îden mezbûre diğer Âişe Hatun’a deynim olan beş yüz guruş deynimi hâlâ edâya kudretim olmamağla deyn-i meblağ-ı mezbûru beher şehr yirmişer guruş kendiye edâ etmek üzere beni tecîl, ol-vechile yirmi beş ay tamamında meblağ-ı mezbûr beş yüz guruşu kendiye tamamen edâ edip deyn-i mezkûrdan halâs olmam murâdımdır deyü tecîl ve taksîte tâlibe olup ta‘ahhüd eyledikde mezbûre diğer Âişe Hatun dahi ber-vech-i muharrer mezbûre Âişe Hatun’u tecîl ve taksît ve deyn-i meblağ-ı mezbûr beş yüz guruşu müeccelen ve mukāssatan ahz ü kabz etmek üzere râzıye olup mukırre-i mezbûre-i medyûnenin vâridesi işbu hâzıratü bi’l-meclis Zeyneb bt. el-Hâc Bekir nâm hatun dahi meblağ-ı müeccel-i merkūm beher şehr yirmişer guruşun mukāssatan edâsına tarafeynden bi’l-emr ve’l-kabûl kefîl ve dâmine olmağın bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 20 min-Ş sene 1205