Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 446 Hüküm no: 645 Orijinal metin no: [54a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mecnun olan Vide isimli Yahudi kızının çevresine zarar verdiğinden dolayı ahalinin şikâyetçi oldukları Ma‘rûz; Medîne-i Üsküdar’a tâbi‘ Kuzguncuk karyesi mütemekkinlerinden olup üç aydan beri cünûn-ı mutbık ile mecnûne olan işbu arzuhâlde mezkûre Vide? bt. Avram nâm Yahûdîye’nin sâkine olduğu karyesi ahâlisinden Hayim v. İlya ve Yasef v. Musi ve Avram v. Efrayim ve Yuda v. Salamon ve Nesim v. Luver? ve Muşalem v. Mayer ve Hamayil v. Avram ve Rapail v. Yako nâm Yahûdîler meclis-i şer‘-i hatîrde mersûme Vide Yahûdîye üç aydan beri mecnûne olup muhâfaza ve terbiye ve mu‘âleceye muhtâc ve karye-i mezbûrede bu misillü mecnûnenin muhâfaza olunacak bîmârhânesi ve gerek zevci ve gerek âhar akrabâsı dahi olmamağla ancak menzilinde ba‘zı ecnebiye nisâ tâifesi muhâfaza edip lâkin mecnûne-i merkūme tarîk-i âmdan mürûr u ubûr eden gerek Müslim ve gerek re‘âyâya sâkine olduğu menzili penceresinden itâle ve günâ-gûn cevr ü ezâ etmekle mecnûne-i merkūmenin etvâr u ef‘âlinden bir türlü emn ü rahatımız yokdur deyü her birinin takrîrleri imtisâlen li’l-emri’l-âlî huzûr-ı âlîlerine i‘lâm olundu. Fî 26 min-Ş sene 1205