Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 447 Hüküm no: 649 Orijinal metin no: [54b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İbrahim b. Ali’nin Ahmed Beşe’ye olan borcunu ödemesi Ma‘rûz; Medîne-i Üsküdar’da Büyük İskele’de kayıkcı tâifesinden Ahmed b. Mehmed meclis-i şer‘-i hatîrde Reis İbrahim b. Ali mahzarında mezbûr İbrahim târih-i i‘lâmdan beş ay mukaddem üç çifte ta‘bîr olunur kayığımı i‘mâl ile ne hâsıl olur ise sekiz hisse i‘tibârıyla [iki] hissesi benim ve altı hissesi kendi ile sâir tâifelerinin olmak üzere mezbûr İbrahim’e îcâr eylediğimde ol dahi istîcâr ve navul ta‘bîr olunur [yüz] doksan beş guruş ücret tesmiyesiyle ma‘lûmü’l-esâmî kimesnelerin eşyâlarını ve kendilerini tahmîl ve meblağ-ı merkūm yüz doksan beş guruş ücreti dahi mezbûrûndan ahz edip hâlâ yedinde mevcûde olmağla meblağ-ı merkūmdan bana isâbet eden kırk sekiz guruş beş akçemi taleb ederim deyü da‘vâ ol dahi cevâbında fi’l-hakīka zikr olunan kayık ücretinden yüz doksan beş guruş kabzını ikrâr, lâkin meblağ-ı merkūmun seksen guruşunu emriyle kayık-ı mezkûrun kumanya ta‘bîr olunur masrûfâtına sarf eyleyip ancak yüz on beş guruş zimmetimde bâkī kalmağla meblağ-ı bâkī-i merkūm yüz on beş guruşdan hissesine yirmi sekiz guruş otuz para isâbet etmiş idi deyü eylediği def‘ini mezbûr Ahmed Beşe inkâr etmeğin dâfi‘-i mezbûr İbrahim ber-vech-i muharrer masrûfât emrini beyâna ba‘de’l-havâle mukırr u mu‘terif olduğu meblağ-ı merkūm yirmi sekiz guruş otuz parayı mezbûr Ahmed Beşe’ye edâsıyla mezbûr İbrahim şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 23 min-Ş sene 1205