Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 448 Hüküm no: 650 Orijinal metin no: [54b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Efendi’nin tasarrufunda bulunan araziye Böcek Ahmed Beşe’nin yaptığı müdahalenin men edilmesi Ma‘rûz; Bi’l-iltimâs kıbel-i şer‘-i şerîfden meb‘ûs Ali Efendi dâ‘îleri medîne-i Üsküdar’a tâbi‘ Küçükçamlıca kurbünde İlisuluğ toprağında vâki‘ arzuhâlde ismi mezkûr Böcek Ahmed Beşe b. el-Hâc Mustafa’nın tasarrufunda olan tarlasının ittisâlinde kâin zikri âtî münâza‘un-fîhâ olan boz, hâlî ormanın üzerine varıp mazbûtü’l-esâmî Müslimîn huzûrlarında akd-i meclis-i şer‘-i Nebevî etdikde mezbûr Ahmed Beşe meclis-i ma‘kūd-ı mezkûrda sâhib-i arzuhâl Istabl-ı âmire kâtiblerinden es-Seyyid Mehmed Efendi b. Ebûbekir nâm kimesne ile terâfu‘larında işbu derûnunda akd-i meclis olunan tarlanın ittisâlinde kâin bir tarafdan Kürd Ali mülkü ve bir tarafdan Kurd zimmî bağı demekle meşhûr es-Seyyid Halil’in bağı ve bir tarafdan benim bağım ve tarlam ve bir tarafdan tarîk-i âmm ile mahdûd bir kıt‘a çalılık ormanın nısfı benim nısf-ı âharı gāib ani’l-meclis es-Seyyid Halil nâm kimesnenin bağlarımız ittisâlinde olmağla müddet-i vâfire müştereken intifâ‘ ve tasarruf üzere iken mezbûr es-Seyyid Mehmed Efendi zikr olunan nısf orman çalılığı fuzûlî zabt ü tasarruf ve bizleri intifâ‘ ve tasarrufundan men‘i murâd eder suâl olunup müdâhalesi men‘ olunmak matlûbumdur deyü sâhib-i arz İsmail Ağa nâm kimesne tarafından vekîl olan Ahmed Ağa b. Abdullah hâzır olduğu hâlde da‘vâ ve mezbûr es-Seyyid Mehmed Efendi cevâbında zikr olunan boz hâlî orman nısf çalılık, yüz seneden mütecâviz tapu ile kimesnenin tasarrufunda olmayıp hâlî ve mu‘attal olduğundan müvekkil-i merkūm sâhib-i arz târih-i i‘lâm senesi Receb-i şerîfinin gurresinde senevî yüz akçe mukāta‘a ile zikr olunan nısf çalılığı bana tefvîz ben dahi tefevvüz ve kabûl etmiş idim deyü takrîrine mutâbık bir kıt‘a tapu temessüğü ibrâzıyla eylediği def‘ini müdde‘î-i merkūm Ahmed Beşe ikrâr ü i‘tirâf etmekle mûcebiyle müdde‘î-i mezbûr Ahmed Beşe’nin nısf çalılık da‘vâsıyla mezbûr es-Seyyid Mehmed Efendi’ye bî-vech mu‘ârazadan men‘ olunduğu mezbûr dâ‘îleri mahâllinde ba‘de’t-tahrîr ve’l-inhâ bi’l-iltimâs huzûr-ı âlîlerine i‘lâm olundu. Fî 17 min-Ş sene 1205