Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 449 Hüküm no: 652 Orijinal metin no: [54b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Seyyid Mehmed Efendi’nin Mustafa b. Mustafa’dan haksız yere aldığı parayı iade etmesi Ma‘rûz; Vilâyet-i Anadolu’da Boyabad kazâsına muzâfe Ovaçay nâhiyesine tâbi‘ Ortaköy karyesi ahâlisinden olup mahmiye-i İslâmbol’da Saray-ı cedîd’de sâkin Bostanî Mustafa b. Mustafa nâm kimesne medîne-i Üsküdar’da mahfil-i bâbda meclis-i şer‘-i hatîrde mârrü’z-zikr Ovaçay nâhiyesi Nâibi es-Seyyid Mehmed Efendi b. İbrahim mahzarında mezbûr es-Seyyid Mehmed Efendi târih-i i‘lâmdan yedi ay mukaddem nâhiye-i mezbûrede nâib iken sâkin olduğum karyeye gelip gāib ani’l-beled Mehmed nâm kimesneyi benim odama bir cürüm ile ithâm etmekle habsedip mezbûr Mehmed dahi hapisden firâr etdikde sen benim habsimi kaçırdın deyü bi-gayrı hakkın beni habs ve yine nâhiye-i mezbûreye tâbi‘ Tozukabarcığı? nâm karyede beş aded İslâmbol nısfiyesiyle bâkīsi beyaz akçe olmak üzere kırk guruşumu bi-gayrı hakkın ahz etmekle taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını Bostanî İsmail [b.] İsmail ve Bostanî Bektaş b. İbrahim nâm kimesneler şehâdetleriyle ber-nehc-i şer‘î isbât etmeğin mûcebiyle meblağ-ı merkūm kırk guruşu müdde‘î-i mezbûra edâ ve teslîme mezbûr es-Seyyid Mehmed Efendi’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 25 min-Ş sene 1205