Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 450 Hüküm no: 654 Orijinal metin no: [54b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Necibe Hanım’ın anne ve babasının telkinlerine inanmayıp kocası Mustafa Ağa’ya itaat etmesi Ma‘rûz; Medîne-i Üsküdar’da Hasanağa mahallesinde sâkin Mustafa Ağa b. Hasan mahfil-i bâbda meclis-i şer‘-i hatîrde kayınvâlidesi zâtı mu‘arrefe Fatıma bt. Abdullah ve kayınatası Abdülkerim b. Abdullah mahzarlarında mezbûrân Fatıma ve Abdülkerim mahalle-i mezbûrede vâki‘ kendi menzilimde senin ile mâ‘an sâkin oluruz deyü beni bi-gayrı hakkın ta‘cîz ve tekdîrden hâlî olmadıklarından mâ‘adâ hâzıratü bi’l-meclis zevcem Necibe Hatun’u iğfâl ve ifsâd eylediklerinden ol dahi bana mutâva‘atından imtinâ‘ etmekle her birine tenbîh-i şer‘î olunmak matlûbumdur dedikde fi’l-hakīka mezbûrûn müdde‘î-i mezbûrun takrîri üzere olduğunu ikrâr etmeleriyle mûcebiyle mezbûrân Fatıma ve Abdülkerim bî-vech ta‘cîz ve tekdîr etmeyip ve mezbûre Necibe Hatun’a dahi zevci mezbûr Mustafa Ağa’ya mutâva‘at eylemek üzere tenbîh olunduğu bi’l-iltimâs huzûr-ı âlîlerine i‘lâm olundu. Fî 21 min-C sene 1205