Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 454 Hüküm no: 660 Orijinal metin no: [55b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çörekci esnafı arasında bozgunculuk yapan Halil Usta’nın ikaz edilmesi Ma‘rûz; Medîne-i Üsküdar’da çörekci esnâfından kethudâları Mustafa b. Hüseyin ve Yiğitbaşı Hafız Ali b. Süleyman ve ustalarından Abdullah Usta b. Ahmed ve Ahmed Usta b. Mehmed ve es-Seyyid Ahmed Ağa b. Mustafa nâm kimesneler meclis-i şer‘-i hatîrde medîne-i mezbûrede kolluk kurbünde Çörekci Halil Usta b. Mehmed mahzarında kadîmden her birimizin fırınlarımıza merbût ma‘lûmü’l-aded tablakârlarımız olup ve her birimize tahsîs olunan tablakârı âhar ustadan biri ahz ve ta‘arruz etmeyip bu vech üzere amel ve hareket cümle beynimizde nizâm-ı kadîm olup bir türlü hilâfıyla hareket ve amel dahi beynimizde memnû‘âtdan olarak mer‘î ve mu‘teber ve düstûrü’l-amel olmuş iken mezbûr Halil Usta hilâf-ı nizâm-ı kadîm mezbûr Hafız Ali’nin tablakârı olan İmâmoğlu Mehmed’i fırınında tablakâr edip ol-vechile nizâm-ı kadîmimizin ihtilâline bâ‘is ve bâdî olmağla bi’d-defa‘ât beynimizde lonca edip mezbûra nush ü pend ve tenbîh eylediğimizde bir türlü mütenebbih ve mütenassıh olmayıp yine ke’l-evvel hilâf-ı nizâm-ı kadîm amel ve hareketinde ısrâr ve inâd edip bir vechile mezbûr mu‘annit [mu‘annid] Halil Usta nev be-nev hilâf-ı nizâm amel ve hareketinden fâriğ olmayıp bir türlü hoşnûd ve râzılar değilleriz, dâimâ esnâfımız beynine ihtilâl verir tedîbe muhtâcdır deyü her biri muvâcehesinde iştikâ ve haber vermeleriyle mezbûr Halil Usta’nın salâh-ı hâlî zâhir oluncaya değin dükkânına girmemek üzere tenbîh olunup ve tedîbi husûsu bi’l-iltimâs huzûr-ı âlîlerine i‘lâm olundu. Fî 19 min-N sene 1205