Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 455 Hüküm no: 661 Orijinal metin no: [55b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tablakâr İsmail ile Bahçıvan Hasan’ın alacak verecek davasında anlaştıkları Ma‘rûz; Medîne-i Üsküdar’da Çavuşbaşı fırınında Tablakâr İsmail b. Ahmed medîne-i mezbûrede mahfil-i bâbda meclis-i şer‘-i hatîrde Bağçevân Hasan b. Mustafa mahzarında mezbûr Hasan bundan akdem yedimden istidâne ve kabz ve umûruna sarfla istihlâk eylediği yüz guruş zimmetinde hakkım olmağla taleb ederim deyü eylediği da‘vâsından bâ-tavassut-ı muslihîn on beş guruş bedel-i makbûz mukābelesinde mezbûr Hasan ile sulh olup ziyâde müdde‘âsına ve bi’l-cümle husûs-ı mezkûra müte‘allika âmme-i de‘âvîden mezbûr Hasan’ın zimmetini ibrâ ve ıskāt ol dahi bedel-i sulh-ı merkūm on beş guruşa ve müdde‘î-i mezbûrdan iddi‘â eylediği yirmi beş guruş kıymetli bir kebe ve yirmi üç guruşa ve bi’l-cümle husûs-ı mezkûra müte‘allika âmme-i de‘âvîden müdde‘î-i mezbûrun zimmetini ibrâ ve ıskāt ve her biri âharın ber-vech-i muharrer ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 27 min-Ş sene 1205