Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 458 Hüküm no: 669 Orijinal metin no: [56a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayserili Mehmed’in Mustafa’dan para talebinde bulunmasının uygunsuz olduğu Ma‘rûz; Fi’l-asl vilâyet-i Anadolu’da Kayseriye kazâsı ahâlisinden olup medîne-i Üsküdar’da handa misâfiren sâkin es-Seyyid Ahmed b. Mustafa medîne-i mezbûrede mahfil-i bâbda meclis-i şer‘-i hatîrde kazâ-i mezbûr ahâlisinden es-Seyyid Mustafa b. Mustafa mahzarında mezbûr es-Seyyid Mustafa gāib ani’l-meclis oğlum eş-Şeyh Mehmed’in taht-ı nikâhında olan kazâ-i mezbûrede sâkine kezâlik gāibetü ani’l-meclis Şerife nâm hatunu fuzûlî kendiye tezvîc edip ba‘dehû oğlum gāib-i mezbûr nikâhına vâkıf oldukda mezbûr es-Seyyid Mustafa ile kazâ-i mezbûre mahkemesinde mürâfa‘a olup zevcesi gāibe-i mezbûre Şerife Hatun ile mezbûr es-Seyyid Mustafa muhâla‘a oldukdan sonra oğlum gāib-i mezbûr ke’l-evvel mezbûre Şerife Hatun’u tezevvüc eylediğinde mezbûr es-Seyyid Mustafa gāibe-i mezbûreyi hul‘ etmek içün oğlum gāib-i mezbûr eş-Şeyh Mehmed’in gerek kazâ-i mezbûr mahkemesine ve gerek sâir ehl-i örf tâifesine hâlâ aynı mevcûd bir neftî yeşil biniş ile iki yüz elli guruş masrûfunu mücerred oğlum gāib-i mezbûrun babası olmamla mezbûr es-Seyyid Mustafa’dan taleb ederim deyü tasaddî eylediği da‘vâsına iltifât olunmadığı bi’l-iltimâs huzûr-ı âlîlerine i‘lâm olundu. Fî 17 min-N sene 1205