Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 459 Hüküm no: 670 Orijinal metin no: [56a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avanis v. Avadik’in Alemdar İbrahim’e olan borcunu ödemesi Ma‘rûz; Askerî tâifesinden Alemdar İbrahim b. Zeynelabidin nâm kimesne medîne-i Üsküdar’da mahfil-i bâbda meclis-i şer‘-i hatîrde Avanis v. Avadik nâm zimmî muvâcehesinde merkūm Avanis zimmî târih-i i‘lâmdan dört sene mukaddem yedimden iştirâ ve kabz eylediği beher topu sekizer guruşa olmak üzere iki top yemeni semeninden on altı guruş ve yine yedimden iştirâ ve kabz eylediği vezn ve fiyâtı beynimizde ma‘lûm duhân ve kahve semenlerinden dört guruş beş para ile yedimden istidâne ve kabz eylediği on beş guruş ki cem‘an cihât-ı mezkûrelerden otuz beş guruş beş para zimmetinde hakkım olmağla hâlâ taleb ederim deyü da‘vâ ol dahi cevâbında meblağ-ı merkūmdan ancak otuz iki guruş beş para deyni olduğunu ikrâr ve ziyâde yüz on beş parayı inkâr etmeğin müdde‘î-i mezbûr Alemdar İbrahim ber-vech-i muharrer ziyâde müdde‘âsını beyâna ba‘de’l-havâle mukırr u mu‘terif olduğu meblağ-ı merkūm otuz iki guruş beş parayı müdde‘î-i mezbûr Alemdar İbrahim’e edâsıyla merkūm Avanis zimmî ilzâm olunduğu bi’l-iltimâs huzûr-ı âlîlerine i‘lâm olundu. Fî 5 min-Şevvâl sene 1205