Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 460 Hüküm no: 672 Orijinal metin no: [56a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Osman’a kiracısı olduğu kahve dükkânını boşaltıp sahiplerine teslim etmesi konusunda tembihte bulunulduğu Ma‘rûz; Medîne-i Üsküdar’da [Toygar] Hamza mahallesi sükkânından Bostanî Bekir Ağa b. Mehmed Molla Yakub b. Yusuf nâm kimesneler medîne-i mezbûrede mahfil-i bâbda meclis-i şer‘-i hatîrde medîne-i mezbûrede Büyük İskele’de vâki‘ ale’l-iştirâk mâlik oldukları bir bâb kahve dükkânında müstecirleri el-Hâc Osman b. Mehmed nâm kimesne mahzarında mezbûr el-Hâc Osman dükkân-ı mezkûrede beher şehr dörder guruş ücret ile müstecirimiz olup lâkin târih-i i‘lâm şehri gāyetinde fesh-i akd-i icâre etmemizle dükkân-ı mezkûru tahliye ve bize teslîme mezbûr el-Hâc Osman’a tenbîh olunmak matlûbumuzdur deyü her biri ba‘de’d-da‘vâ ve’l-istintâk ve’l-ikrâr mûcebiyle gāyet-i şehr-i mezkûrda dükkân-ı mezkûru tahliye ve müdde‘iyân-ı mezbûrâna teslîme mezbûr el-Hâc Osman’a tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-L sene 1205