Bab Mahkemesi 150 Numaralı Sicil (H. 1143-1144 / M. 1730-1732) cilt: 65, sayfa: 430 Hüküm no: 446 Orijinal metin no: [103a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Çoban Ali Ağa’nın Yahûdi David ve Salamon’a kefalet ve alacak davasından olan borcunu ödemeye tenbih olunduğu Ma‘rûz Arzuhâl eden David ve Salamon nâm Yahûdiler meclis-i şer‘de arzuhâlde ismi mastûr sâbıkā bostancı hasekilerinden Çoban Ali b. Abdullah mahzarında gāib ani’l-meclis Bahadır Giray zimmetinde bâ-temessük cihet-i karzdan hakkımız olan üç bin yüz elli guruşa tarafından emr-i kabûlü hâviye kefâlet ile merkūm Çoban Ali kefîl olmağla yedinden iki bin guruşu kabz olunmağın mâ‘adâ bin yüz elli guruş taleb eylediğimizden gayrı cihet-i karzdan iki bin guruş dahi kendi zimmetinde hakkımız olup hattâ kirâren ve mirâren ikrâr u i‘tirâf etmekle meblağ-ı mezbûr iki bin guruşu dahi taleb ederiz deyü da‘vâ eylediklerinde mezbûr Çoban Ali cevâbında cihet-i kefâletden üç bin yüz elli guruşu i‘tirâf lâkin meblağ-ı mezbûrdan bir def‘a [bin yüz] kırk senesi Rebî‘ülevveli’nde bin altı yüz elli guruş zolota ve bin beş yüz guruş para edâ ve teslîm eyledim deyü mukābele eyledikde mesfûrân David ve Salamon Yahûdiler dahi târih-i i‘lâmdan iki gün mukaddem cihet-i kefâletden bin yüz elli guruş bizlere zimmetinde deyni olduğunu ikrâr eyledi deyü def‘le mukābele ve def‘-i mezbûruna İstanbul’da Vâlidehanı’nda [103b] sâkin Yusuf b. Abdullah ve Mahmudpaşa’da sâkin Mehmed b. Ali nâm kimesneler vech-i şer‘î üzere şehâdet-i şer‘iyye etmeleriyle ba‘de’t-ta‘dîl ve’t-tezkiye şehâdetleri makbûle olmağın mûcebiyle edâsına mezbûr Çoban Ali Ağa’ya tenbîh olundukdan sonra mezbûr Çoban Ali Ağa cihet-i karzdan mesfûrân David ve Salamon Yahûdilerin iddi‘â eyledikleri iki bin guruş ikrârımda ben kâzib mesfûrân Yahûdiler ikrârım da‘vâlarında mübtillerdir deyip şer‘an mezbûr Ali Ağa ikrâr-ı mezbûrundan kâzib ve kendileri da‘vâlarında mübtiller olmadıklarına mesfûrân David ve Salamon Yahûdilere yemîn teklîf olundukda onlardan dahi her biri yemîn bi’llâhillezî enzele’t-Tevrât alâ-Musa -aleyhi’s-salâtü ve’s-selâm- etmeğin mûcebiyle iki bin guruşun dahi edâsıyla merkūm Çoban Ali Ağa’ya tenbîh olunduğu huzûr-ı âlîlerine i‘lâm olundu. Fî 23 Safer sene [1]143.