Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 462 Hüküm no: 678 Orijinal metin no: [56b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hanım’ın Mehmed b. Osman’daki alacaklarının tahsil olunup evinin üzerindeki kaydın kaldırılması Ma‘rûz; Medîne-i Üsküdar’da Hayreddin Çavuş mahallesinde sâkine ve zâtı mu‘arrefe Emetullah bt. Abdullah nâm hatun meclis-i şer‘-i hatîrde Mehmed b. Osman mahzarında mezbûr Mehmed bin iki yüz senesi Muharremi’l-harâmın on yedinci günü yedimden iktirâz ve kabz eylediği üç yüz guruş deyni mukābelesinde mahalle-i mezbûrede vâki‘ etrâf-ı erba‘ası Gurâbiyeci İsmail Çelebi ve el-Hâc Ömer mülkleri ve tarîk-i âm ile mahdûd büyût-ı adîdeyi müştemil bir bâb mülk menzilini bi-tarîki’l-istiğlâl bana bey‘ u teslîm ba‘dehû beher sene tamamında kırk beşer guruşdan üç sene tamamına dek yüz otuz beş guruş ücretle ba‘de’t-tahliye benden istîcâr etmiş idi hâlâ müddet-i icâre tamam ve iki sene dahi mürûr etmekle deyn-i meblağ-ı merkūm üç yüz guruşu bana edâ ve teslîm ve menzil-i mezkûr istiğlâlden fekk olunmak üzere mezbûr Mehmed’e tenbîh olunmak matlûbumdur deyü târih-i merkūm ile müverraha bir kıt‘a istiğlâl hücceti ibrâzıyla ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm üç yüz guruşu müdde‘iye-i mezbûre Emetullah Hatun’a edâ ve teslîm ile menzil-i mezkûru istiğlâlden fekke ve mezbûr Mehmed’e tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-Şevvâl sene 1205