Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 463 Hüküm no: 680 Orijinal metin no: [56b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Balmumu üretmek için Ömer b. İbrahim’in arsasını kiralayan Hasan Beşe’nin kira anlaşmasının feshi üzerine anılan arsayı tahliye etmesi Ma‘rûz; Medîne-i Üsküdar’da Hacce Hüsni(ye) Hatun mahallesinde sâkin Ömer b. İbrahim nâm kimesne medîne-i mezbûrede meclis-i şer‘-i hatîrde zikri âtî arsada müşâhereten müsteciri Hasan Beşe b. Hasan nâm kimesne mahzarında mezbûr Hasan Beşe bundan akdem mahalle-i mezbûrede Bülbül Deresi nâm mahâlde vâki‘ ma‘lûmü’l-hudûd bir kıt‘a arsamı beher şehr beşer guruş ücret kavliyle istîcâr ve arsa-i mezkûrede izin ve icâzetimle şem‘-i asel kârhânesi olmak üzere muktezî olduğu mikdârı ba‘zı ebniye ihdâs etmiş idi hâlâ arsa-i mezkûrenin bana lüzûmu olmağla işbu târih-i i‘lâm şehri gāyetinde fesh-i akd-i icâre ile arsa-i mezkûreyi tahliye ve bana teslime kıbel-i şer‘den mezbûr Hasan Beşe’ye tenbîh olunmak matlûbumdur deyü da‘vâ ve mezbûr Hasan Beşe cevâbında fi’l-hakīka hâl müdde‘î-i mezbûrun takrîr-i meşrûhu üzere olduğunu ikrâr etmekle arsa-i mezkûreyi gāyet-i şehr-i mezkûrda tahliye ve müdde‘î-i mezbûr Ömer Beşe’ye ikrârı mûcebince teslîme mezbûr Hasan Beşe’ye tenbîh olunduğu bi’l-iltimâs huzûr-ı âlîlerine i‘lâm olundu. Fî 16 min-Şevvâl sene 1205