Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 464 Hüküm no: 682 Orijinal metin no: [56b-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Güreşirken Ahmed’in ayağını kıran Mustafa’yla ilgili davada ailelerin diyet konusunda anlaştıkları Ma‘rûz; Medîne-i Üsküdar’da Arakıyeci el-Hâc Mehmed mahallesinde sâkine mu‘arrefetü’z-zât Havva bt. Mehmed nâm hatun meclis-i şer‘-i hatîrde hâzır bi’l-meclis Mustafa nâm sagīrin babası ve velîsi Mehmed b. Abdullah mahzarında mezbûr Mustafa târih-i i‘lâmdan bir gün mukaddem mahalle-i mezbûrede vâki‘ tarîk-i âmmda gāib ani’l-meclis oğlum sagīr Ahmed ile güreşirler iken sagīr-i mezbûr Mustafa oğlum Ahmed’i bi-gayrı hakkın kaldırıp yere darb etmekle taşa isâbet edip ve sağ ayağının incik kemiği münkesir olmağla mûcib-i şer‘îsini taleb ederim deyü eylediği da‘vâsından bâ-tavassut-ı muslihîn sekiz guruş bedel-i makbûz mukābelesinde sagīr-i mezbûr Mustafa’nın babası mezbûr Mehmed ile sulh olup husûs-ı mezkûra müte‘allika âmme-i de‘âvîden babası mezbûr Mehmed ile oğlu sagīr Mustafa’nın zimmetlerini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min- L sene 1205