Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 465 Hüküm no: 683 Orijinal metin no: [56b-8] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Abdi Beşe’nin Hüseyin Ağa ve Halil Beşe’ye olan borçlarını taksitle ödemesi Ma‘rûz; Mahmiye-i İslâmbol’da Hocapaşa Hamamı’nda sâkinler Hüseyin Ağa b. Süleyman ve Halil Beşe b. Mustafa nâm kimesneler medîne-i Üsküdar’da meclis-i şer‘-i hatîrde Arnabud Abdi Beşe b. Hüseyin nâm kimesne mahzarında mezbûr Abdi Beşe işbu bin iki yüz beş senesi Cumâdelâhiresi’nin yirmi altıncı günü bir kıt‘a deyn temessüğü nâtık olduğu üzere yedimizden bi-tarîki’l-karz istidâne ve kabz eylediği altmış guruş zimmetinde hakkımız olmağla taleb ederiz deyü her biri da‘vâ ol dahi cevâbında müdde‘iyân-ı mezbûrâna ol-mikdâr meblağ deyni olduğunu ikrâr ü i‘tirâf edip lâkin meblağ-ı merkūmu hâlen ve def‘aten edâya kudreti olmayıp istimhâl eyledikde müdde‘iyân-ı mezbûrân dahi târih-i i‘lâmdan beher şehr tamamında üçer guruşdan yirmi ay tamamına değin edâ etmek üzere bi’t-terâzî mezbûr Abdi Beşe’yi tecîl ve taksît eylediklerinde ol dahi ber-vech-i muharrer müeccelen ve mukāssatan edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 14 min- L sene 1205