Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 465 Hüküm no: 684 Orijinal metin no: [57a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfcı Ali’nin ve karısının ortaklaşa sahip oldukları evin komşuları Tütüncü Mehmed’in evine verdiği zararın giderilmesi Ma‘rûz; Vârid olan fermân-ı âlî-şâ[n]larına imtisâlen kıbel-i şer‘den meb‘ûs Esad Efendi dâ‘îleri ve mi‘mâr-ı hâssa tarafından müte‘ayyin Ali Reşid ve Süleyman halîfeler ile medîne-i Üsküdar’da Kefçe mahallesinde vâki‘ zikri âtî münâza‘un-fîh menzile varıp mazbûtü’l-esâmî Müslimîn huzûrlarında akd-i meclis-i şer‘-i şerîf eyledikde sâhib-i arzuhâl Duhânî Mehmed b. Hüseyin nâm kimesne meclis-i ma‘kūd-ı mezkûrda derûn-ı arzuhâlde ismi mezkûr Kadayıfcı el-Hâc Ali b. Hasan ve zevcesi mu‘arrefetü’z-zât Fatıma bt. İbrahim nâm hatun muvâcehelerinde zevcân-ı mezbûrâtın mahalle-i mezbûrede vâki‘ lede’l-ahâli ve’l-cîrân ma‘lûmü’l-hudûd ve’l-müştemilât ale’l-iştirâki’s-seviyy mutasarrıf olup müceddeden binâ ve henüz nâ-tamam olan menzillerini on iki zirâ‘dan ziyâde irtifâ‘ ile binâ eylediklerinden mâ‘adâ benim kurbünde kâin mutasarrıf olduğum menzilimin makarr-ı nisvân olan mahâlline nezâreti olup ve ol-vechile zarar-ı şer‘îsi olmağla ber-vech-i muharrer zararları men‘ ü def‘ olunmak matlûbumdur deyü da‘vâ eyledikde mi‘mârân-ı mezbûrân ve sâir ehl-i vukūf ile mu‘âyene ve misâha eylediklerinde fi’l-hakīka zevcân-ı mezbûrânın menzilleri on iki zirâ‘dan ziyâde altı parmak irtifâ‘ı olduğundan mâ‘adâ menzil-i mezkûrun tabaka-i vüstâ ve ulyâsından on aded pencerelerinden müdde‘î-i mezbûr Duhânî Mehmed’in menzilinin makarr-ı nisvân olan mevâzi‘ine nezâretiyle zarar-ı şer‘îsi olduğu zâhir ve müşâhed olmağla zevcân-ı mezbûrânın menzillerinin zikr olunan pencerelerine tahta perde vaz‘ıyla müdde‘î-i mezbûrun menzilinin zarar-ı merkūmu def‘ olacağı mi‘mârân-ı mezbûrânın keşf ve ihbârlarıyla lede’ş-şer‘i’l-enver zâhir ve mütehakkık olup lâkin müdde‘î-i mezbûr tahta perde vaz‘ıyla zararlarını def‘ u men‘a kanâ‘at etmeyip zikr olunan pencerelerin bi’l-külliye sedd ü bendlerini istid‘â ile ısrâr ve ol-vechile beynlerinde ba‘de-vukū‘ı’l-münâza‘a bâ-tavassut-ı muslihîn müdde‘î-i mezbûr Mehmed tasaddî eylediği da‘vâsından meccânen fâriğ ve kendi menzili duvarı üzerine tahta perde vaz‘ıyla zarar-ı mezkûru def‘ ve zevcân-ı mezbûrânın menzillerine müte‘allika âmme-i de‘âvîden zimmetlerini ibrâ, onlar dahi ibrâsını kabûl edip bu vechile kat‘-ı münâza‘a eylediklerini mezbûr dâ‘îleri mahâllinde ba‘de’t-tahrîr ve’l-inhâ huzûr-ı âlîlerine i‘lâm olundu. Fî 18 min-L sene 1205