Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 466 Hüküm no: 685 Orijinal metin no: [57a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hafız Ali’nin Keresteci Todori’ye olan borcunu taksitle ödemesi Ma‘rûz; Medîne-i Üsküdar’da Demirciler kurbünde Keresteci Todori v. Kirope nâm zimmî meclis-i şer‘-i hatîrde Çörekci Hafız Ali b. Süleyman mahzarında mezbûr Hafız Ali târih-i i‘lâmdan beş ay mukaddem yedimden iştirâ ve kabz eylediği aded ve fiyâtı beynimizde ma‘lûm kereste semeninden yüz altmış bir guruş hakkımın yüz on üç guruşu yedinden ahz ü kabz ve kırk sekiz guruşu zimmetinde hakkım bâkī kalmağla taleb ederim deyü da‘vâ ve mezbûr Hafız Ali cevâbında fi’l-hakīka cihet-i mezkûreden bâkī müdde‘î-i merkūma ol-mikdâr deyni olduğunu ikrâr lâkin def‘aten edâya kudreti olmayıp tecîle tâlib olmağla müdde‘î-i mezbûr dahi deyn-i meblağ-ı merkūm kırk sekiz guruşu târih-i i‘lâmdan beher şehr tamamında dörder guruşdan cem‘an on iki ay tamamına değin kendiye edâ etmek üzere bi’r-rızâ mezbûr Hafız Ali’yi tecîl ve taksît eyledikde ol dahi ber-minvâl-i muharrer müeccelen ve mukāssatan edâya ta‘ahhüd ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 16 min-L sene 1205