Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 467 Hüküm no: 687 Orijinal metin no: [57a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Terzi Avanes’in Ayşe bt. Mustafa’ya olan borcunu ödemesi Ma‘rûz; Medîne-i Üsküdar’da Ahmed Çelebi mahallesinde sâkine mu‘arrefetü’z-zât Âişe bt. Mustafa nâm hatun meclis-i şer‘-i hatîrde Terzi Avanis v. Nikagos nâm zimmî muvâcehesinde merkūm Terzi Avanis zimmî bâ-ferâğ-ı menzil yedimden istidâne ve kabz ve umûruna sarfla istihlâk eylediğim [eylediği] yüz guruş hakkımı taleb ederim deyü ba‘de’d-da‘vâ ve’l-istintâk ve’l-ikrâr alâ-mûcebi ikrârihi meblağ-ı merkūm yüz guruşun edâsıyla merkūm Avanis zimmî şer‘an ilzâm olunduğu medîne-i mezbûre mahkemesinde tescîl ve bi’l-iltimâs huzûr-ı âlîlerine i‘lâm olundu. Fî 18 min-L sene 1205