Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 467 Hüküm no: 688 Orijinal metin no: [57a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Emetullah Hanım’ın hizmetini gördüğü Rukiye Hanım ile aralarındaki ücret anlaşmazlığında sulh oldukları Ma‘rûz; Medîne-i Üsküdar’da Toygar Hamza mahallesinde sâkine ve zâtı mu‘arrefe sâhibe-i arzuhâl Emetullah bt. Süleyman nâm hatun meclis-i şer‘-i hatîrde derûn-ı arzuhâlde mezkûratü’l-ism Rukiye bt. Mehmed Emin nâm hatunun zevci ve tarafından ber-vech-i âtî mürâfa‘a ve sulh ve ibrâya vekîl olduğu zât-ı mezbûreyi bi’l-ma‘rifeti’ş-şer‘iye ârifân İbrahim Ağa b. el-Hâc Süleyman ve es-Seyyid İsmail b. Süleyman nâm kimesneler şehâdetleriyle sâbit olan Ali Ağa b. el-Hâc Mehmed mahzarında ben târih-i i‘lâmdan yirmi bir ay mukaddeme gelince zevcesi müvekkile-i mezbûre Rukiye Hatun’un menzilinde talebiyle kendiye bilâ-tesmiyeti’l-ücre on iki sene hizmet etmemle sinîn-i mezkûre[e] sebkat eden hizmetimin ecr-i mislini taleb ederim deyü da‘vâ, vekîl-i mezbûr cevâbında müdde‘iye-i mezbûre müvekkilem mezbûre Rukiye Hatun’a ancak altı sene hizmet edip ecr-i misli mukābelesinde bin iki yüz dört senesi Muharremi’l-harâm’ın yirmi beşinci günü târihiyle müverraha yedinde olan bir kıt‘a hüccet-i şer‘iye [mantûkunca] eşyâ-i memlûkesinden dört entari ve bir hırka ve bir havlu ve üç makrama ve üç çevre ve bir yağlık ve beş uçkurluk bez ve iki uçkur ve iki top bez ve bir çârşeb ve bir sofra ve iki bohca ve iki yorgan ve dört yasdık ve iki minder ve üç baş yasdığı ve üç sahan ve bir sini ve iki tencere ve bir leğen ma‘a ibrik ve bir tas ve nakden on guruşunu müdde‘iye-i mezbûreye def‘ ü teslîm ol dahi âmme-i de‘âvîden müvekkilem mezbûrenin zimmetini ibrâ etmiş idi deyü takrîrine mutâbık bir kıt‘a hüccet ibrâzıyla beynlerinde ba‘de-vukū‘ı’l-münâza‘a müdde‘î-i mezbûr eylediği altı sene ziyâde da‘vâsından bâ-tavassut-ı muslihîn elli guruş bedel-i makbûz mukābelesinde müvekkile-i mezbûre Rukiye Hatun ile sulh olup târih-i i‘lâma gelince ecr-i misline ve hukūk-ı sâireye müte‘allika âmme-i de‘âvî ve mütâlebâtdan müvekkile-i mezbûre Rukiye Hatun’un zimmetini ibrâ-yı âm ile ibrâ ve ıskāt ol dahi bedel-i sulh nâmıyla medfû‘u olan elli guruşa ve sâire müte‘allika âmme-i de‘âvîden müdde‘iye-i mezbûrenin zimmetini ibrâ-yı âm ile ibrâ ve ıskāt ve her biri ber-vech-i muharrer âharın ibrâsını ba‘de’l-kabûl, bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 24 min-L sene 1205