Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 468 Hüküm no: 689 Orijinal metin no: [57a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın Ümmügülsüm Hanım’dan aldığı borca karşılık rehin olarak eşya verdiği yolundaki iddiasını ispatlayamadığı Ma‘rûz; Medîne-i Üsküdar’da Hasanağa mahallesinde sâkine mu‘arrefetü’z-zât Fatıma bt. Mustafa nâm hatun meclis-i şer‘-i hatîrde kezâlik zâtı mu‘arrefe Ümmügülsüm bt. Yusuf nâm hatun mahzarında târih-i i‘lâmdan dört sene mukaddem mezbûre Ümmügülsüm Hatun yedinden istidâne ve kabz eylediğim elli guruş mukābelesinde emlâkimden mecmû‘-ı kıymetleri iki yüz elli guruşa bâliğ bir penbe zâr gömlek ve bir gezi şalvar ve bir uçkur ve yedi aded çevre ve on beş değirmi mücessem yemeni ve bir sahtiyân entari ve bir şalî entari ve bir beldar entari ve bir içi sandallı gezi hırka ve bir gezi kürk kabı ve bir bürüncek gömlek ve iki peştamâlimi yedine rehin vaz‘ ve teslîm etmiş idim hâlâ deyn-i meblağ-ı merkūm elli guruşu yedimden ahz ve rihân-ı merkūmeyi bana teslîme tenbîh olunmak matlûbumdur deyü da‘vâ ve mezbûre Ümmügülsüm Hatun dahi meblağ-ı merkūm elli guruşu müdde‘iye-i mezbûreye idâne ve teslîm eylediğini tasdîk lâkin ber-vech-i muharrer rihân-ı merkūmeyi ahzını inkâr etmeğin müdde‘iye-i mezbûre Fatıma Hatun müdde‘âsını beyân ve isbât içün ba‘de’l-istimhâl ve’l-imhâl müddet-i mehl-i şer‘î tamam olup müdde‘âsını bir vechile beyân ve isbâta kādir[e] olamayıp tahlîfe dahi tâlibe olmamağla müdde‘iye-i mezbûre Fatıma Hatun ber-vech-i muharrer müdde‘âsını beyâna ba‘de’l-havâle mukırr u mu‘terif olduğu deyn-i meblağ-ı merkūm elli guruşu dâyinesi mezbûre Ümmügülsüm Hatun’a edâsıyla ilzâm olunduğu bi’l-iltimâs huzûr-ı âlîlerine i‘lâm olundu. Fî 27 min-L sene 1205