Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 469 Hüküm no: 690 Orijinal metin no: [57b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadayıfcı Ali’nin ve karısının komşularının şikâyeti üzerine evlerinin altında kadayıfcı dükkânı açmaktan vazgeçtikleri Ma‘rûz; Medîne-i Üsküdar’da Kefçe mahallesi İmâmı Osman Efendi b. İbrahim ve es-Seyyid, eş-Şeyh el-Hâc Mehmed Şûhî Efendi b. Ali ve İbrahim b. Mehmed ve es-Seyyid Mustafa b. Feyzullah ve Ahmed Efendi b. Mehmed ve es-Seyyid Salih b. İsmail ve Mehmed Ağa b. Hüseyin ve Mahmud Ağa b. Ahmed ve Mehmed Emin Ağa b. Mustafa ve Ahmed Beşe b. İbrahim ve es-Seyyid Mehmed Tâhir b. Abdülgani ve Abdülgani b. es-Seyyid Halim ve İsmail b. Musa ve Derviş Mustafa b. Osman ve Osman Beşe b. Hasan nâm kimesneler meclis-i şer‘-i hatîrde Kadayıfcı Ali b. Hasan ve mu‘arrefetü’z-zât Fatıma bt. İbrahim nâm zevcân mahzarlarında zevcân-ı mezbûrân mahalle-i mezbûrede müceddeden bir menzil binâ ve menzil-i mezkûrun tahtına bir aded kadayıfcı dükkânı binâ ve menzil-i mezkûrun dükkân-ı mezkûr derûnundan hilâf-ı âdet kapısını küşâd etmek murâd edip lâkin dükkân-ı mezkûrun kurb ve civârı menâzil olup dükkân-ı mezkûr derûnunda ateş yakdığı hînde cümlemiz havf üzere olacağımız zâhir olmağla bi’d-defa‘ât kendiye nush ü pend ve tenbîh eylediğimizde mütenassıhlar olmayıp ef‘âlinde ısrâr ve zevcân-ı mezbûr[â]nın bu misillü harekâtlarından emn ü rahatımız bi’l-külliye meslûb olmuşdur deyü teşekkî eylediklerinde zevcân-ı mezbûrân dahi fî-mâ ba‘d menzil-i mezkûrun tahtına kadayıfcı dükkânı binâ ve ihdâs etmeyip bir kepenk dükkân binâ ve kapısını küşâd ve kadayıfcı dükkânı yapmakdan fâriğ olup tarafeyn bu vechile beynleri ıslâh olunduğu bi’l-iltimâs huzûr-ı âlîlerine i‘lâm olundu. Fî 25 min-L sene 1205