Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 469 Hüküm no: 691 Orijinal metin no: [57b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar’daki çörekcilerin eski kethudası Pehlivan Mustafa’nın sefere gönderilecek iki asker için esnaftan topladığı paraları iade etmesi Ma‘rûz; Medîne-i Üsküdar’da çörekci esnâfının hâlâ kethudâları Ahmed b. Ahmed ve Mustafa b. Mustafa ve Abdurrahman b. İbrahim ve Halil b. Mehmed ve Ali b. İbrahim nâm kimesneler medîne-i mezbûrede mahfil-i bâbda meclis-i şer‘-i hatîrde Sâbıkā kethudâları Pehlivan Mustafa b. Mehmed mahzarında mezbûr Mustafa esnâf-ı mezkûrenin kethudâsı iken sefer-i hümâyûn içün esnâf-ı mezkûreden matlûb olan neferâtın techîz ve ücretleri olmak üzere medîne-i mezbûre ustalarından ahz ve cem‘ eylediği yüz yetmiş dört guruşun yetmiş dört guruşunu yine esnâf-ı mezkûre umûrlarına harc ü sarf edip bâkī yüz guruşunu ustalar ma‘rifetiyle ma‘lûmü’l-eşhâs iki nefer kimesneye ücret olmak üzere def‘ ü teslîm edip lâkin mezbûrân iki nefer kimesneler mahâll-i memûrlarına râhî olmayıp tekrar bizler esnâf-ı merkūme taraflarından iki nefer şahıs dahi techîz ve sefer-i hümâyûna irsâl eylediğimize binâen ma‘rifetiyle medfû‘u olan meblağ-ı bâkī yüz guruşu mezbûr Pehlivan Mustafa’dan istirdâd sadedinde olmamızla beynimizde münâza‘ât-ı kesîre vâkı‘a olmuş idi el-hâletü hâzihî meblağ-ı merkūm yüz guruşu mezbûrân ikrârlarıyla medîne-i mezbûreye geldikde mezbûrûndan ahz ve esnâf-ı mezkûreye redd ü teslîm etmek üzere ta‘ahhüd eyledikde bizler dahi râzılar olup kat‘-ı münâza‘a eyledik deyü merkūmûndan her birinin takrîr-i meşrûhunu mezbûr Pehlivan Mustafa tasdîk eylediği bi’l-iltimâs huzûr-ı âlîlerine i‘lâm olundu. Fî 19 min-L sene 1205