Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 470 Hüküm no: 693 Orijinal metin no: [57b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mühtedî Doktor Mustafa’nın bulunduğu mahalleden çıkarıldığı Ma‘rûz; Medîne-i Üsküdar’da Rum Mehmedpaşa mahallesinde sâkin Veznedâr İbrahim’in kayınvâlidesi Emine bt. Süleyman nâm hatunun medîne-i mezbûrede Büyükhamam karşısında Tabib mühtedî Mustafa ile medîne-i mezbûre mahkemesinde Dîvân-ı âlî’de ve Çarşamba günü arz odasında merkūm mühtedî Mustafa mezbûr İbrahim’in menzilinde leyl ü nehâr tek ü tenhâ mütemekkin olup ol-vechile envâ‘-ı erâcîf ve havâdis-i mâ-lâ-yenbâgîyi mûcib hâlâta bâdî olur töhmetiyle müttehem oldukları bi’d-defa‘ât mürâfa‘a ve münâza‘a ve husûmetleri şuyû‘una binâen tabîb-i merkūm dükkânından ihrâc ve fî-mâ ba‘d Üsküdar’a ayak basmamak üzere mahâll-i âhara nakl ile terbiye ve iz‘âcı bâbında temîn-i ibâd ve tathîr-i bilâd içün tarafımıza hitâben beyaz üzerine sudûr olan fermân-ı isâbet-nişân-ı âlîlerine imtisâlen merkūm meclis-i şer‘a ihzâr ve ahâli ve hem-civârları mahzarında tabîb-i merkūmu ber-mantûk-ı emr-i âlî dükkânından ihrâc ve bu günden sonra kat‘a Üsküdar’a ayak basmayıp ve Üsküdar’da bulunur ise tedîb ve gûş-mâl olunacağını gereği gibi kendiye tenbîh ve tekîd ve tahzîr ve teşdîd olundukda ol dahi dükkânında olan bi’l-cümle eşyâsını hâzır bi’l-meclis kalfası Yarasimon nâm zimmîye bey‘ ü teslîm ile dükkân-ı mezkûrdan hurûc ve bu günden sonra vech-i muharrer Üsküdar’a ayak basmamak üzere ta‘ahhüd ve bu vechile mazhar-ı da‘avât-ı hayriye-i ahâliye bâ‘is ve bâdî olduğu mübâşiri kapıkethudâsı iltimâsıyla huzûr-ı âlîlerine i‘lâm olundu. Fî-gurrei Zilka‘de sene 1205