Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 472 Hüküm no: 695 Orijinal metin no: [57b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bakkal Yani v. Yorgi’nin kendisine beş ay hizmet eden Bahçıvan Yorgi’ye ücretini ödemesi Ma‘rûz; Medîne-i Üsküdar’a tâbi‘ Büyükgöksu nâm mahâlde mütemekkin arzuhâl eden Bağçevân Yorgi v. Yani medîne-i mezbûrede meclis-i şer‘-i hatîrde arzuhâlde mezkûr Bakkāl Yani v. Yorgi muvâcehesinde târih-i i‘lâmdan dokuz ay mukaddem senevî yüzer guruş ücret kavliyle merkūm Yani zimmîye dükkânında altı ay hizmet edip meblağ-ı müsemmâ-yı merkūmdan şühûr-ı mezkûreye isâbet eden elli guruş hakkımı taleb ederim deyü da‘vâ ol dahi cevâbında müdde‘î-i merkūmu istîcârını ve ancak beş ay hizmetinde olduğunu ikrâr ve ziyâde bir ay hizmetini inkâr etmeğin müdde‘î-i merkūm ziyâde bir ay hizmetini beyâna ba‘de’l-havâle mukırr u mu‘terif olduğu beş aylık kırk bir buçuk guruş yirmi akçenin müdde‘î-i merkūm Yani zimmîye edâsıyla merkūm Yorgi zimmî şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 28 min-L sene 1205