Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 472 Hüküm no: 696 Orijinal metin no: [58a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mehmed Şakir Efendi’nin bağındaki kirazları dalındayken satın alıp başkasına satan Mustafa b. Hüseyin’in zarar iddiasıyla para talebinde bulunmasının uygun olmadığı Ma‘rûz; Medîne-i Üsküdar’da Vâlide-i Atik mahallesinde sâkin Mustafa b. Hüseyin nâm kimesne meclis-i şer‘-i hatîrde Mehmed Şakir b. Mehmed Emin mahzarında mezbûr Mehmed Şakir Efendi işbu sene-i mübârekede medîne-i mezbûre hâricinde Küçükçamlıca[da] vâki‘ ma‘lûmü’l-hudûd bir kıt‘a bağının mahsûrü’l-aded eşcâr-ı memlûkesi üzerinde kemâl bulmuş kirazını tağrîr ve gabinden ârî mücâzefeten olmak üzere kırk iki buçuk guruşa bana bey‘ ve temlik ben dahi iştirâ ve tesellüm ve kabûl edip ve idrâk eyleyen bi’l-cümle kirazını âhara ba‘de’l-bey‘ on iki buçuk guruş zararım olmağla bâyi‘-i mezbûr Mehmed Şakir Efendi’den zarar-ı merkūmu taleb ederim deyü takrîri üzerine tasaddî eylediği da‘vâsına iltifât olunmadığı bi’l-iltimâs huzûr-ı âlîlerine i‘lâm olundu. Fî 21 min-L sene 1205