Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 472 Hüküm no: 697 Orijinal metin no: [58a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fatma Hanım’ın Ümmügülsüm Hanım’a olan borcunu ödeyip rehin bıraktığı eşyalarını teslim aldığı Ma‘rûz; Medîne-i Üsküdar’da Hasanağa mahallesinde sâkine sâhibe-i arzuhâl mu‘arrefetü’z-zât Fatıma bt. Mustafa nâm hatun meclis-i şer‘-i hatîrde kezâlik derûn-ı arzuhâlde mezkûretü’l-ism Ümmügülsüm bt. Yusuf nâm hatun mahzarında târih-i i‘lâmdan dört sene mukaddem mezbûre Ümmügülsüm Hatun yedinden istidâne ve kabz eylediğim elli guruş mukābelesinde emlâkimden mecmû‘-ı kıymetleri iki yüz elli guruşa bâliğ ve bir penbe zâr gömlek ve bir gezi şalvar ve bir uçkur ve on beş değirmi yemeni ve bir muhabbethâne entari ve bir şalî entari ve bir gezi hırka ve bir gezi kürk kabı ve iki peştamal ve bir berdar entari ve bir bürüncek gömlek ve yedi aded çevremi yedine rehn vaz‘ ve teslîm etmiş idim deyü deyn-i meblağ-ı merkūm elli guruşunu ahz ve rihân-ı merkūmeyi bana teslîme tenbîh olunmak matlûbumdur deyü eylediği da‘vâsından bâ-tavassut-ı muslihîn meccânen fâriğa olup husûs-ı mezkûra ve beynlerinde münâza‘un-fîh olan bir bâb menzilinden mâ‘adâ hukūk-ı şer‘iye-i sâireye müte‘allika âmme-i de‘âvîden merkūme Ümmügülsüm Hatun’un zimmetini ibrâ ve ıskāt eylediğinde ol dahi iddi‘â eylediği elli guruş da‘vâsından meccânen fâriğa olup husûs-ı mezkûr ve kezâlik beynlerinde ma‘lûm mârrü’z-zikr münâza‘un-fîh olan menzilden mâ‘adâ hukūk-ı şer‘a müte‘allika âmme-i de‘âvîden müdde‘iye-i mezbûrenin zimmetini ibrâ ve ıskāt ve her biri âharın ber-vech-i muharrer ibrâsını kabûl ve bu vechile kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 4 min-Za sene 1205