Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 473 Hüküm no: 698 Orijinal metin no: [58a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Sungurbey Mukataası Mültezimi Halil Ağa hakkında haksız para aldığı yolundaki iddiaların ispatlanamadığı Ma‘rûz; Vilâyet-i Anadolu’da Kütahya sancağında Şeyhli kazâsı ahâlisinden sâhib-i arzuhâl Molla Hüseyin b. Eyüb ve Molla İbrahim b. Abdulfettah nâm kimesneler meclis-i şer‘-i hatîrde Sığırbeyi Mukâta‘ası mültezimi olup derûn-ı arzuhâlde ismi mezkûr Halil Ağa b. Ahmed ile terâfu‘larında târih-i i‘lâmdan bir sene mukaddem mezbûr Halil Ağa’nın kethudâsı gāib ani’l-meclis İbrahim nâm kimesne mezbûr Molla Hüseyin’i sirka töhmetiyle ithâm ve altmış guruşunu ahz ve mezbûr Molla İbrahim’i kezâlik sirka töhmetiyle ithâm ve gāib ani’l-meclis vilâyet a‘yânı olan Çorbacıoğlu İsmail Ağa altmış guruşunu ahz ve mültezim-i mezbûr Halil Ağa dahi kendi bi-nefsihî mezbûr Molla İbrahim’i kezâlik sirka töhmetiyle ithâm ve elli dokuz guruşumuzu ahz eylediler deyü ber-vech-i muharrer tasaddî eyledikleri da‘vâlarında gāibân-ı mezbûrân kethudâ ve a‘yândan her birine edâ ve teslîm eylediğimiz yüz yirmi guruşu mezbûr Halil Ağa’dan taleb ederiz deyü mezbûrân Molla İbrahim ve Molla Hüseyin’in eyledikleri da‘vâları meşrû‘a olmayıp ve mezbûr Halil Ağa kendinin ithâmıyla mezbûr Molla İbrahim’den merkūm elli dokuz guruş ahzını inkâr ve müdde‘î-i mezbûr Molla İbrahim’in talebiyle ba‘de’t-tahlîfi’ş-şer‘î mûcebiyle müdde‘î-i mezbûr İbrahim da‘vâ-yı mezkûresiyle bilâ-beyyine mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 3 min-Za sene 1205