Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 474 Hüküm no: 699 Orijinal metin no: [58a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yamandi v. Mihal’in vârislerine kalan mallarının taksim edildikten sonra vârisler arasındaki satışa müdahale edilmemesi Ma‘rûz; Medîne-i Üsküdar’a muzâfe Gekbûze nâhiyesine tâbi‘ Darıca karyesi mütemekkinlerinden iken bundan akdem hâlik olan Yamandi v. Hırsogono v. Mihal zimmînin verâseti zevcesi Maruka bt. Yani ile sulbî kebîr oğulları Papa Hırisontoz ve Andon ve Zorzi ile kebîre kızı Mariya’ya münhasıra ve tashîh meselesi bi-hükmi’l-ferâiz sekiz sehm i‘tibârıyla bir sehmi zevce-i mezbûreye ve ikişer sehmden altı sehmi oğulları merkūmûna ve bir sehmi kızı mezbûreye isâbeti tahakkukundan sonra arzuhâl eden merkūm Papa Hırisontoz zimmî kendi nefsinden asâleten ve merkūmûn Maruka ve Andon ve Rozi [Zorzi] ve Mariya taraflarından vekîl-i müseccelleri olmağla vekâleten mahfil-i bâbda meclis-i şer‘-i hatîrde derûn-ı arzuhâlde mezkûrü’l-ism kendi nefsinden asâleten ve karındaşı İstefani zimmî tarafından vekîl-i müsecceli olan Yorgi zimmî mahzarında sâlifü’z-zikr Darıca karyesinde Filinger? nâm mahâlde vâki‘ iki tarafdan mesfûrân İstefan[i] ve Yorgi bağları ve bir tarafdan Papaoğlu Yorgi bağı ve bir tarafdan ba‘zan tarla ve ba‘zan tarîk-i âm ile mahdûd tahmînen sekiz dönüm mikdârı bir kıt‘a kürûmu mülk bağ hâlik-i merkūmun ile’l-helâk yedinde mülkü ve ba‘de-helâkihî tashîh-i merkūm üzere bize mevrûs olmağla ben bağ-ı mahdûd-ı mezkûru târih-i i‘lâmdan iki gün mukaddem mahmiye-i İslâmbol’da Mahmiye [Mahmud] paşa Mahkemesi’nde bâ-hüccet-i şer‘iye karındaşlar merkūmân Yorgi ve İstefani zimmîlere ale’l-iştirâki’s-seviyy elli guruşa bey‘ u temlik eylediğimde onlar dahi ber-vech-i muharrer iştirâ ve temellük ve kabûl edip lâkin karye-i mezbûre mütemekkinlerinden gāibûn ani’l-meclis Kocabaşı Palaş ve Çorbacı Dimitri ve Papaoğlu Yorgi ve Kostandi zimmîler beni tağrîr edip semen-i meblağ-ı merkūm elli guruş bağ-ı mahdûd-ı mezkûrun semen-i mislinden noksân olmağla ol-vechile bey‘-i mezkûrda gabn-ı fâhiş olduğuna binâen bağ-ı mahdûd-ı mezkûru istirdâd ederim deyü takrîri üzere tasaddî eylediği da‘vâsı meşrû‘a olmadığı mübâşiri çavuş kulları iltimâsıyla huzûr-ı âlîlerine i‘lâm olundu. Fî 28 min-L sene 1205