Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 477 Hüküm no: 705 Orijinal metin no: [58b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Cafer’in, Seyyid Mehmed ile Molla Mustafa’ya olan borçlarını ödemesi Ma‘rûz; Mahmiye-i İslâmbol’da Sîmkeş Hanı’nda sâkin sâhib-i arzuhâl es-Seyyid Mehmed b. İbrahim ve Molla Mustafa b. İbrahim nâm kimesneler medîne-i Üsküdar’da mahfil-i bâbda meclis-i şer‘-i hatîrde arzuhâlde ismi mezkûr Hüseyin b. Cafer nâm kimesne mahzarında mezbûr Hüseyin bin iki yüz dört senesi Cumâdelûlâ’sının on beşinci günü târihiyle müverrah bir kıt‘a deyn temessüğü mûcebince yedimizden istidâne ve kabz eylediği mezbûr es-Seyyid Mehmed’in yüz doksan dört guruş ve mezbûr Molla Mustafa’nın yüz altı guruş ki cem‘an üç yüz guruş zimmetinde hakkımız olmağla taleb ederiz deyü takrîrlerine mutâbık bir kıt‘a temessük ibrâzıyla da‘vâ ve mezbûr Hüseyin cevâbında fi’l-hakīka müdde‘î-i mezbûr es-Seyyid Mehmed yedinden yüz doksan dört guruş ve mezbûr Molla Mustafa yedinden yüz altı guruş ki cem‘an üç yüz guruş istidâne ve kabz edip hâlâ zimmetinde deyni olduğunu ikrâr ü i‘tirâf etmeğin mûcebiyle meblağ-ı mecmû‘-ı merkūm üç yüz guruşun müdde‘iyân-ı mezbûrâna edâsıyla mezbûr Hüseyin şer‘an [ilzâm] olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 6 min-Şevvâl sene 1205