Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 478 Hüküm no: 706 Orijinal metin no: [58b-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer b. Hüseyin’in, debbağ esnafından bazı kişilere olan borçlarını ödemesi Ma‘rûz; Medîne-i Üsküdar’da debbâğ esnâfının kethudâları es-Seyyid Osman b. Ahmed ve yiğitbaşıları Osman b. Hüseyin ve ustalarından İbrahim b. el-Hâc Süleyman ve es-Seyyid Osman b. Ömer ve Mustafa b. el-Hâc Osman ve Abbas b. Abdullah ve es-Seyyid Hasan b. Mehmed ve Ali b. el-Hâc Mehmed ve Hafız Mehmed b. el-Hâc Mustafa nâm kimesneler medîne-i mezbûrede meclis-i şer‘-i hatîrde debbâğ kalfalarından Ömer b. Hüseyin mahzarında bundan akdem cânib-i mîrîden matlûb olan sığır derisi debâgati içün tarafımızdan mezbûr Ömer’i ücret-i ma‘lûme ile cümlemiz istîcâr ve debâgat olunacak derilerin mesârifini kendiye teslîm ol dahi debâgat edip kendiye teslîm eylediğimiz mesârif ile hufyeten kendi mâlı olan yüz aded sığır derisini bizim mesârifimizle debâgat ve âhara bey‘ edip zikr olunan derilerin beheri ancak yüzer para mesârif ile debâgat olunmağla mezbûrun kendi mâlı olmak üzere debâgat eylediği yüz aded derilerin mesârifi olan iki yüz elli guruşu mezbûr Ömer’den taleb ederiz deyü da‘vâ ve mezbûr Ömer cevâbında fi’l-hakīka kendi mâlı olmak üzere yüz aded derilerini merkūmûnun mesârifi ile debâgat eylediğini ikrâr lâkin mezbûrûnun izin ve rızâlarıyla debâgat etmiş idim deyü eylediği def‘ini ve mezbûrûn zimmetlerinde gerek ücret ve gerek deri semeninden iki yüz on altı guruş hakkım vardır deyü eylediği da‘vâsını beyâna ba‘de’l-havâle mukırr u mu‘terif olduğu deyn-i meblağ-ı mezbûr iki yüz elli guruşu müdde‘iyûn-ı mezbûrûna edâ ve teslîmle merkūm Ömer Kalfa ilzâm olunduğu bi’l-iltimâs huzûr-ı âlîlerine i‘lâm olundu. Fî 2 min-Za sene 1205