Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 479 Hüküm no: 708 Orijinal metin no: [59a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Sediri’nin Kosti v. Todori’ye olan borcunu ödemesi Ma‘rûz; Tersâne-i âmire’de mütemekkin Kosti v. Todori nâm zimmî medîne-i Üsküdar’da mahfil-i bâbda meclis-i şer‘-i hatîrde Dimitri v. Sedri nâm zimmî muvâcehesinde merkūm Dimitri zimmî bundan akdem yedimden iktirâz ve kabz ve umûruna sarfla istihlâk eylediği yedi yüz guruş hakkımın dört yüz yetmiş guruşunu ahz ü kabz ve iki yüz otuz guruşu zimmetinde bâkī kalıp hattâ merkūm Dimitri cihet-i karzdan yedi yüz guruş zimmetinde bana deyni olduğunu ikrâr ve bir kıt‘a Rûmî temessük yedime i‘tâ etmişdi deyü bir kıt‘a temessük ibrâzıyla da‘vâ, merkūm Dimitri zimmî cevâbında fi’l-hakīka cihet-i karzdan meblağ-ı merkūm yedi yüz guruş deyni olmak üzere ikrârını ve yedine temessük verdiğini ikrâr lâkin müdde‘î-i mezbûra cihet-i karzdan ancak beş yüz guruş deynim olup mâ‘adâ iki yüz guruş deynim yoğiken meblağ-ı merkūmu kâziben ikrâr etmiş idim deyü ba‘de’d-def‘ ve’l-inkâr dâfi‘-i mersûm Dimitri ber-vech-i muharrer def‘ini isbâtdan izhâr-ı acz birle mukırr-ı mersûm ikrârında kâzib olmadığına bi’t-taleb müdde‘î-i merkūm Kosti zimmî gıbbe’t-tahlîfi’ş-şer‘î merkūm Dimitri alâ-mûcebi ikrârihi deyn-i meblağ-ı bâkī-i merkūm iki yüz otuz guruşu müdde‘î-i merkūma edâ ve teslîme merkūm Dimitri zimmîye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 27 min-Şevvâl sene 1205