Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 480 Hüküm no: 709 Orijinal metin no: [59a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ohannes v. Bedros’un kendisini bıçakla yaralayan Manas zimmî ile sulh olduğu Ma‘rûz; Medîne-i Üsküdar’da Yenimahalle’de mütemekkin Ohannes v. Bedros nâm zimmî meclis-i şer‘-i hatîrde Manas v. Melkon nâm zimmî muvâcehesinde merkūm Manas zimmî târih-i i‘lâmdan üç gün mukaddem mahalle-i mezbûrede mütemekkin olduğum menzilim kapısı önünde ba‘de’l-mağrib Çerkes bıçağı ile bi-gayrı hakkın amden sağ ve sol kasığım altlarından birer mahâllinden darb ve cerh etmekle mûcib-i şer‘îsini taleb ederim deyü eylediği cerh da‘vâsından bâ-tavassut-ı muslihîn beş guruş bedel-i makbûza sulh, Manas zimmî ile an-inkârin sulh olup cerh-i mezkûra ve mâ-yuhdesü minhe müte‘allika âmme-i de‘âvîden merkūm Manas zimmînin zimmetini ba‘de’l-ibrâ ve’l-kabûl kat‘-ı münâza‘a eyledikleri bi’l-iltimâs huzûr-ı âlîlerine i‘lâm olundu. Fî 8 min-Za sene 1205