Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 480 Hüküm no: 711 Orijinal metin no: [59a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Hüseyin’in kız kardeşine ait evin yarısını satın alırken yaşlı annesine bakma taahhüdünü yerine getirmediği Ma‘rûz; Mahmiye-i İslâmbol’da Nakilbend mahallesinde sâkin sâhib-i arzuhâl Ahmed b. Hüseyin medîne-i Üsküdar’da mahfil-i bâbda meclis-i şer‘-i hatîrde kız karındaşı arzuhâlde ismi mezkûre mu‘arrefetü’z-zât Ümmügülsüm binti’l-mezbûr Hüseyin mahzarında medîne-i mezbûreye muzâfe Yoros nâhiyesine tâbi‘ Dereseki karyesinde vâki‘ etrâf-ı erba‘ası Saka Halil ve Abdullah Beşe ve Süleyman Beşe mülkleri ve tarîk-i âm ile mahdûd ma‘lûmü’l-müştemilât bir bâb mülk menzil kız karındaşım mezbûrenin yedinde mülkü iken menzil-i mezkûrun nısf-ı şâyi‘ini bin iki yüz bir senesi Muharrem’inin sekizinci günü Yoros mahkemesinde yüz yirmi beş guruş semen tesmiyesiyle bana bey‘ u temlik ve semen-i mezkûr mutâlebesinden zimmetimi dahi ibrâ etmiş iken hâlâ menzil-i mezkûrun nısf-ı şâyi‘ine bi-gayrı hakkın vâzı‘atü’l-yed olmağla nısf menzil-i mezkûrdan kasr-ı yed ve bana teslîme tenbîh olunmak matlûbumdur deyü takrîrine mutâbık bir kıt‘a mübâya‘a hücceti ibrâzıyla da‘vâ ve mezbûre Ümmügülsüm cevâbında fi’l-hakīka menzil-i mezkûrun nısf-ı şâyi‘ini karındaşı müdde‘î-i mezbûra semen-i mezkûra bey‘ eylediğini ikrâr edip lâkin ihtiyâr ve alîle olan vâlidelerini ölünceye değin görüp gözetmek şartıyla semen-i merkūmdan karındaşı mezbûrun zimmetini ibrâ edip vâlidelerini ancak üç gün İslâmbol’da menzilinde meks ve ikāmet etdirip ba‘dehû yine karye-i mezbûreye irsâliyle beslemeyip ile’l-vefât benim menzilimde sâkine olmuş idi deyü ba‘de’d-def‘ ve’l-inkâr dâfi‘a-i mezbûre Ümmügülsüm dâfi‘-i mezkûrunu karye-i mezbûre sükkânından es-Seyyid İsmail b. İsmail ve Ahmed Beşe b. Ahmed ve diğer İsmail b. İbrahim nâm kimesneler şehâdetleriyle vech-i şer‘î üzere muvâcehesinde isbât etmeğin mûcebiyle müdde‘î-i mezbûr Ahmed nısf menzil-i mezkûr da‘vâsıyla kız karındaşı mezbûre Ümmügülsüm’e bî-vech mu‘ârazadan men‘ olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî-selh-i Şevvâl sene 1205