Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 482 Hüküm no: 713 Orijinal metin no: [59a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Panayot v. Labnor’un Uncu İsidor’a olan borcunu ödemesi Ma‘rûz; Medîne-i Üsküdar’a muzâfe Beykoz kasabasında Uncu, derûn-ı arzuhâlde ismi mezkûr İsodor v. Kirkor nâm zimmî medîne-i mezbûrede mahfil-i bâbda meclis-i şer‘-i hatîrde kasaba-i mezkûrede Semerci, arzuhâl eden Panayot v. Labnor? nâm zimmî muvâcehesinde merkūm Panayot zimmî bundan akdem yedimden iştirâ ve kabz eylediği beynimizde ma‘lûmü’l-vezn dakīk semeninden bâkī iki yüz altmış iki buçuk guruş zimmetinde hakkım olup işbu târih-i i‘lâm senesi Recebi’l-ferd’in yirmi ikinci günü kasaba-i mezbûre mahkemesinde merkūm Panayot zimmîden taleb ederim deyü ( ) ol dahi ikrâr ve edâsıyla ilzâm olundukdan sonra meblağ-ı merkūmun yetmiş altı buçuk guruşunu bana edâ ve teslîm ve yüz seksen altı guruşu zimmetinde bâkī kalmağla taleb ederim deyü takrîrine mutâbık bir kıt‘a i‘lâm ibrâzıyla da‘vâ ve merkūm Panayot zimmî cevâbında fi’l-hakīka cihet-i mezkûreden ol-mikdâr deynini ve mazmûn-ı i‘lâmı ikrâr etmekle ikrârı mûcebince meblağ-ı bâkī-i merkūm yüz seksen altı guruşu müdde‘î-i merkūma edâ ve teslîme merkūm Panayot zimmîye tenbîh olunduğu bi’l-iltimâs huzûr-ı âlîlerine i‘lâm olundu. Fî 11 min-Za sene 1205