Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 482 Hüküm no: 714 Orijinal metin no: [59b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Saatci Bedros ile Saatci Karabet’in ortaklıklarının devam etmesi Ma‘rûz; Medîne-i Üsküdar’da Davudpaşa mahallesinde vâki‘ sâ‘atci dükkânında Sâ‘atci Bedros v. Serope nâm zimmî meclis-i şer‘-i hatîrde yine dükkân-ı mezkûrda Sâ‘atci Karabet v. Mardıros nâm zimmî muvâcehesinde merkūm Karabet zimmî ile dükkân-ı mezkûrda şerîk olup mâ‘an sâkin ve bundan akdem dükkân-ı mezkûrun ta‘mîrine mâlımdan yüz elli guruş harc ü sarf etmiş iken hâlâ dükkân-ı mezkûrdan beni ihrâc ve hâzır bi’l-meclis Sâ‘atci Melkit v. Zakar nâm zimmî teşrîk ve iskân etmekle masrûfâtımı bana teslîm yâhûd kemâ-fi’l-evvel beni iskân eylesin deyü da‘vâ ve dükkân-ı mezkûr civârında sâkin mazbûtü’l-esâmî Müslimîn meclis-i şer‘de merkūm Melkit zimmî içün bundan akdem ibâdullâhın ta‘mîr içün verdikleri sâ‘atlerini dükkânıma sarık duhûl eyledi sâ‘atleriniz sirka olundu deyü ızrâr etmiş idi deyü adem-i emniyetlerini ihbâr ve merkūm Karabet zimmî fî-mâ ba‘d merkūm Melkit zimmîyi dükkânında iskân etmeyip ve müdde‘î-i merkūm Bedros zimmîyi kemâ-fi’l-evvel dükkân-ı mezkûrda şerîk olmak üzere bi’t-terâzî iskâna ta‘ahhüd ve bu vechile kat‘-ı husûmet eyledikleri bi’l-iltimâs huzûr-ı âlîlerine i‘lâm olundu. Fî 2 min-Za sene 1205