Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 483 Hüküm no: 715 Orijinal metin no: [59b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İsmail’in emanet aldığı parayı sahibine teslim etmesi Ma‘rûz; Mahrûse-i Galata muzâfâtından kasaba-i Kasımpaşa’da sâkin es-Seyyid Mehmed b. Hüseyin medîne-i Üsküdar’da mahfil-i bâbda meclis-i şer‘-i hatîrde es-Seyyid İsmail b. Halil mahzarında târih-i i‘lâmdan sekiz sene mukaddem emlâkimden üç çifte ta‘bîr olunur kayığımı gāib ani’l-meclis Mehmed nâm kimesneye altmış guruşa bey‘ u teslîm ve otuz yedi guruşunu gāib-i mezbûr yedinden ahz ü kabz ve yirmi üç guruşu gāib-i mezbûr zimmetinde bâkī hakkım kalıp mezbûr Mehmed dahi meblağ-ı bâkī-i merkūm yirmi üç guruşu bana edâ ve teslîm içün mezbûr es-Seyyid İsmail’e teslîm ol dahi ahz ü kabz etmiş iken bana vermeyip yedinde kalmağla taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı merkūm yirmi üç guruşun müdde‘î-i mezbûr es-Seyyid Mehmed’e edâsıyla mezbûr es-Seyyid İsmail şer‘an ilzâm olunduğu bi’l-iltimâs huzûr-ı âlîlerine i‘lâm olundu. Fî 8 min-Za sene 1205