Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 486 Hüküm no: 723 Orijinal metin no: [60a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan b. Mehmed’in Eskici Serkiz v. Karabet’e olan borcunu ödemesi Ma‘rûz; Medîne-i Üsküdar’da Davudpaşa mahallesinde mütemekkin Eskici Serkiz v. Karabet nâm zimmî medîne-i mezbûrede mahfil-i [meclis-i] şer‘-i hatîrde Hasan b. Mehmed nâm kimesne mahzarında mezbûr Hasan târih-i i‘lâmdan iki ay mukaddem yedimden iştirâ ve kabz eylediği fiyâtı beynimizde ma‘lûm eskici metâ‘ı semeninden ba‘de-külli’l-hesâb iki yüz yetmiş sekiz para ve yine üç çift mest ve pabuç ve bir çift çizme semenlerinden dört yüz on para ki cem‘an altı yüz seksen sekiz para zimmetinde hakkım olmağla taleb ederim deyü da‘vâ ve mezbûr Hasan cevâbında fi’l-hakīka cihet-i mezkûre [den] bâkī iki yüz yetmiş sekiz para deyni olduğunu ikrâr lâkin zikr olunan üç çift mest ve pabuç ve çizmeyi muhayyer olmak üzere iştirâ ve bi’r-rızâ bey‘-i mezkûru fesh ve ikāle ve teslîm etmiş idim deyü ba‘de’d-def‘ ve’l-inkâr dâfi‘-i mezbûr Hasan def‘-i mezkûrunu beyândan izhâr-ı acz birle müdde‘î-i merkūm Serkiz zimmî bi’t-taleb gıbbe’t-tahlîfi’ş-şer‘î mûcebiyle meblağ-ı mecmû‘-ı merkūm altı yüz seksen sekiz parayı müdde‘î-i merkūma edâ ve teslîme merkūm Hasan’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 4 min-Za sene 1205