Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 488 Hüküm no: 727 Orijinal metin no: [60a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hüseyin b. Cafer’in Osman Efendi’ye olan borcunu ödemesi Mahmiye-i İslâmbol’da Eminönü’nde Manav Bekir Beşe b. Ali nâm kimesne ile zâtı mu‘arrefe Emine bt. Hüseyin nâm hatun medîne-i Üsküdar’da mahfil-i bâbda meclis-i şer‘-i hatîrde Osman Efendi b. Murad nâm kimesne mahzarında mezbûre Emine Hatun’un zevci gāib ani’l-meclis Hüseyin b. Cafer zimmetinde mezbûr Osman Efendi’nin cihet-i karzdan yüz guruş ve medîne-i mezbûreye tâbi‘ Kādı karyesinde vâki‘ bostan ücretinden beş yüz beş guruş ki cem‘an ciheteyn-i mezkûreteynden altı yüz beş guruş müsbet ve mahkûmün-bih alacak hakkı olup hâlen ve def‘aten edâya iktidârı olmadığına binâen biz deyn-i meblağ-ı merkūm altı yüz beş guruşun iki yüz elli guruşuna her birimiz müte‘âkiben kefîl ve dâmin olup târih-i i‘lâmdan altmış bir gün tamamına değin müeccelen ve kefâleten edâ etmek üzere ta‘ahhüd eylediğimizde mezbûr Osman Efendi dahi kefâletimizi kabûl etmiş idi deyü mezbûrân Bekir Beşe ve Emine Hatun’un takrîr-i meşrûhlarını mezbûr Osman Efendi tasdîk ve bu vechile beynleri ıslâh olunduğu mübâşiri çavuş kulları iltimâsıyla huzûr-ı âlîlerine i‘lâm olundu. Fî 8 min-Za sene 1205