Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 488 Hüküm no: 728 Orijinal metin no: [60a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. İbrahim’in Hasan Çelebi’ye olan borcunu ödemesi Ma‘rûz; Medîne-i Üsküdar’da Hamzafakih mahallesinde sâkin Hasan Çelebi b. el-Hâc Hüseyin nâm kimesne medîne-i mezbûrede mahfil-i bâbda meclis-i şer‘-i hatîrde Ali b. İbrahim mahzarında târih-i i‘lâmdan beş ay mukaddem yedimden istidâne ve kabz ve umûruna sarfla istihlâk eylediği iki yüz guruş hakkım mezbûr Ali zimmetinde kalmağla taleb ederim deyü da‘vâ, ol dahi cevâbında cihet-i mezkûreden ancak yüz doksan beş guruş kabz eylediğini ikrâr ve meblağ-ı merkūm doksan beş guruşun bundan akdem yüz on beş guruşunu müdde‘î-i mezbûra def‘ ü teslîm edip ancak zimmetimde seksen guruş deynim bâkī kalmış idi deyü eylediği def‘inde müdde‘î-i mezbûr Hasan Çelebi ancak yüz beş guruş ahzını ikrâr ve mâ‘adâ on guruşu inkâr etmeğin müdde‘î-i mezbûr Hasan Çelebi’nin ziyâde müdde‘âsı olan beş guruşu ve dâfi‘-i mezbûr Ali’nin ziyâde def‘i olan on guruşdan her birini beyâna ba‘de’l-havâle dâfi‘-i mezbûr Ali’nin mertebe-i ikrârı olan doksan guruşu müdde‘î-i mezbûr Hasan Çelebi’ye edâ ve teslîme mezbûr Ali’ye şer‘an tenbîh olunduğu bi’l-iltimâs huzûr-ı âlîlerine i‘lâm olundu. Fî 14 min-Za sene 1205