Üsküdar Mahkemesi 531 Numaralı Sicil (H. 1204-1207 / M. 1790-1793) cilt: 81, sayfa: 489 Hüküm no: 729 Orijinal metin no: [60a-7] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed b. Ali’nin kefaletten dolayı Ahmed b. Hasan’a olan borcunu ödemesi Ma‘rûz; Medîne-i Üsküdar’da Vâlide-i Atik mahallesinde sâkin es-Seyyid Mehmed b. Hüseyin medîne-i mezbûrede mahfil-i bâbda meclis-i şer‘-i hatîrde Ahmed b. Ali mahzarında mezbûr Ahmed târih-i i‘lâmdan bir buçuk sene mukaddem karındaşı gāib ani’l-beled Mehmed zimmetinde yedimden iştirâ ve kabz eylediği ma‘lûmü’l-vezn çelik ta‘bîr olunur demir semeninden kırk beş guruş alacak hakkıma tarafeynden bi’l-emr ve’l-kabûl kefâlet-i sahîha-i şer‘iye ile kefîl ve dâmin olup meblağ-ı merkūm kırk beş guruşun on beş guruşunu bi-hükmi’l-kefâle edâ ve teslîm edip otuz guruşu bâkī kalmağla kefâletine binâen hâlâ taleb ederim deyü ba‘de’d-da‘vâ ve’l-istintâk ve’l-ikrâr mûcebiyle meblağ-ı bâkī-i merkūm otuz guruşun bi-hükmi’l-kefâle edâsıyla mezbûr Ahmed ilzâm olunup lâkin def‘aten edâya kudreti olmamağla beher haftada beşer guruş verip cem‘an bir buçuk ay tamamına değin edâ etmek üzere te’cil eyledikde mezbûr Ahmed dahi meblağ-ı bâkī-i merkūm otuz guruşu ber-minvâl-i muharrer bi-hükmi’l-kefâle mukāssatan ve müeccelen edâya ta‘ahhüd eylediği bi’l-iltimâs huzûr-ı âlîlerine i‘lâm olundu. Fî 23 min-Şevvâl sene 1205